१९ मंसिर / अर्थ र व्यापार – आगामी नयाँ नेतृत्व चयन गर्ने साधारण सभा तथा निर्वाचनको मिति नजिकिएसँगै अहिले नेपालका अटोमोवाइल व्यवसायीलाई चुनावी चटारो बढेको छ । आगामी २२ र २३ मंसिरमा हुने निर्वाचनको दिन आउन अब तीन दिन मात्र बाँकी रहेकाले अहिले नाडा अध्यक्षका प्रत्यासी उम्मेदवारहरु करण चौधरी र धुर्ब थापाले भिन्दाभिन्दै समुह घोषणा गरेर चुवानी माहोल तताएका छन । चुनावी माहोल तताएर आ –आफ्नो पक्षमा मत ल्याउने प्रयासमा अहिले दुबै समुह जुटिरहेको छ ।
अटो व्यवसायीहरुको छाता संस्था नाडा एशोसियसन अफ नेपालको साधारणसभा तथा निर्वाचन यही २२ र २३ मंसिरमा हुँदै छ । नाडाको आगामी नेतृत्व आफ्नो पक्षमा पार्नका लागि अहिले प्रतिष्ठित व्यवसायिक घराना चौधरी समूहका सदस्य तथा सिजी मोटोकर्पका  कार्यकारी निर्देशक करण चौधरी र अर्का व्यवसायी धुर्व थापा बीच प्रतिस्पर्धा हुने छ । अध्यक्षका उम्मेदवार चौधरी नाडाको वर्तमान कार्यसमितिका उपाध्यक्ष हुन् भने थापा पूर्व उपाध्यक्ष हुन् । 
यस निर्वाचनकालागि चौधरी समूह र थापा समूहले आ–आफ्ना पक्षमा मत ल्याउन मतदाता व्यवसायी फकाउन अनेक प्रयास गरिरहेका छन । 
यस निर्वाचनमा नाडा अध्यक्षका प्रत्यासी उम्मेदवार करण चौधरी युवा व्यवसायी हुन् । उनी कार्यकारी निर्देशक रहेको सिजी होल्डिङस , मोटोकर्पले नेपालमा सुजुकीका गाडिहरु बिक्री गर्दै आएको छ । नेपालमै गल्फ आयल इन्टरनेसनलको प्रत्यक्ष निगरानीमा गल्फ लुब्रिकेन्ट उत्पादन गर्ने नेपाल ल्युब आयलको पनि उनी निर्देशक छन् । यसअघिको निर्वाचनपछि उपाध्यक्ष मनोनयन गरिएसँगै चौधरीलाई भावी अध्यक्षको रुपमा हेरिँदै आएको थियो । चौधरीले चार विषयमा स्नाकोत्तर गरेका छन् ।  
चौधरीको राम्रो गुण उनी राम्रो बोली व्यवहारका कारण सजिलै मान्छेलाई आफ्नो पक्षमा ल्याउन र उसको विश्वास जित्न सिपालु छन् । चौधरी समूहको सदस्य भएकाले उनमा फरक खालको संस्कार देखिन्छ ।  नाडा अध्यक्षका अर्का प्रत्यासी ध्रुव थापाले भने फोर्स मोटरको पोखराको डिलर लिएर गाडिहरु बिक्री गर्दै आएका छन् । उनी अध्यक्ष रहेको हिमालय अर्गनाइजेसन फोर्स मोटरको आधिकारिक बिक्रेता आयाम इन्टरकन्टिनेन्टल प्रालिको पोखराको डिलर हो । पोखरामा सीमित भएर गाडि बिक्री गर्ने भएकाले उनले नाडाको केन्द्रीय नेतृत्वमा यसअघि प्रतिस्पर्धा गर्न पछि हटेका थिए । अहिले नाडाको आगामी नेतृत्व हत्याउन थापा मज्जाले लागेका छन । 
यसअघिको निर्वाचनमा वर्नमान अध्यक्ष तथा अध्यक्षका त्यतिबेलाका अर्का प्रत्यासी कृष्णप्रसाद दुलालले ‘आगामी निर्वाचनमा सहयोग गरौंला’ भनेर आश्वासन दिएपछि थापा पछि हटेका थिए । उनको सो निर्णयलाई कतिपयले आत्मबल कमजोर भएको व्यक्तिको रुपमा हेर्छन् भने कतिपयले सहमतिमा आउनसक्ने लचिलो व्यक्तिको रुपमा हेर्छन् । अर्कोतर्फ थापाको अटोमोवाइलमा भन्दा होटल, घरजग्गामा ठूलो लगानी छ । यद्यपि उनले त्यो क्षेत्रबाट आफ्नो नेतृत्व विकास गर्ने भन्दा पनि नाडालाई नै रोजेका छन् । पोखराको नेपाली काँग्रेसको राजनीतिमा समेत सक्रिय रहेका थापाले सानो लगानीबाट अहिले होटल र घरजग्गामा अबौंको लगानी जुटाउन सफल भएका छन् । यसैगरि, अध्यक्षका प्रत्यासी थापा लायन्स क्लबमा पनि सक्रिय छन् । लायन्स क्लबमा नाडाका धेरै सदस्य आवद्ध रहेकाले उनले क्लबकै सदस्यहरुले मात्रै सहयोग गरे पनि आफुले सजिलै यो निर्वाचन जित्ने दावी गर्दै आएका छन् ।