२८ जेठ / अर्थ र व्यापार- सिभिल बैंकको प्रमुख कार्यकारी अधिकृत पदमा सुनिलकुमार पोखरेल नियुक्त भएका छन । बैंकको सञ्चालक समितिले असार १८ गतेदेखि लागू हुने गरी पोखरेललाई प्रमुख कार्यकारी नियुक्त गरेको हो । उनी केही समयदेखि बैंकको कामु प्रमुख कार्यकारी अधिकृत थिए । यसअघि गोविन्द गुरुङले बैंकको प्रमुख कार्यकारी अधिकृत बाट राजीनामा गरेपछि पोखरेलले वैशाख १८ गतेदेखि कामु प्रमुख कार्यकारीको जिम्मेवारी पाएका थिए ।

पोखरेललाई बैंक सञ्चालक समितिले चार वर्षका लागि प्रमुख कार्यकारी बनाएको हो । पोखरेल कामु प्रमुख कार्यकारी हुनुअघि नायब प्रमुख कार्यकारी अधिकृतको जिम्मेवारीमा थिए ।  पोखरेलसँग विदेशस्थित बैंकदेखि नेपालमै रहेको विदेशी बैंकमा काम गरेको समेत अनुभव छ ।

उनले सन् १९९१ बाट बैंकिङ करिअर सुरु गरेका उनले तत्कालिन ग्रिण्डलेज बैंकमा १९ वर्षभन्दा बढी काम गरेका थिए । त्यसपछि उनले एनआइसी एसियामा करिब ५ वर्ष र नबिल बैंकमा एक वर्ष काम गरे । त्यसपछि उनले म्यानमारस्थित युनाइटेड अमरा बैंकमा काम गरे । त्यहाँ डेढ वर्ष काम गरेपछि उनले म्यानमारकै एजीडी बैंकमा अर्को डेढ वर्ष बिताए ।