वार्षिक एकसय कामदार नपठाएका म्यानपावरको नवीकरण सुरु

510 पटक पढिएको

२७ साउन/अर्थ र व्यापार – सरकारले वार्षिक १ सय जना कामदार वैदेशिक रोजगारीमा पठाउन नसक्ने मेनपावरको नवीकरण सुरु भएको छ । वैदेशिक रोजगार विभागले उनीहरूको नविकरण सुरु गरेको हो ।
विभागका महानिर्देशक कमलप्रसाद भट्टराईले मंगलबारदेखि नै नवीकरण सुरु गरिएको बताए । दुई वर्षसम्म वार्षिक १ सय कामदार पठाउन नसक्ने म्यानपावर व्यवसायीहरूको इजाजतपत्र रद्ध गरिने कानूनी व्यवस्था थियो । तर, हालै केही नेपाल ऐन संशोधनमार्फत सो प्रावधान खारेज गरिएको छ ।
खारेज गरिएसँगै श्रम, रोजगार तथा सामाजिक सुरक्षा मन्त्रालयले बोर्डलाई नवीकरण गर्न पत्राचार गरेको थियो । सोही अनुसार विभागले नवीकरण सुरु गरेको महानिर्देशक भट्टराईले बताए । उनका अनुसार नवीकरण अनलाइनमार्फत समेत गरिनेछ । त्यसका लागि म्यानपावर व्यवसायीहरूले आवश्यक कागजात अनलाइनमार्फत पेश गर्नपर्ने हुन्छ । सोही आधारमा विभागले नवीकरण गरिदिने उनको भनाइ छ ।
२०७५ सालमा वैदेशिक रोजगार ऐन संशोधन गर्दै दुई वर्षसम्म लगातार वार्षिक एकसय जना कामदार नपठाउने व्यवसायीको इजाजतपत्र रद्ध गर्ने व्यवस्था राखिएको थियो । तर, हरेक वर्ष बाधा अड्काउ फुकाउमार्फत सरकारले नवीकरण गर्दै आएको थियो ।
ऐनमा संशोधन भएपछि नियमावलीमा संशोधन हुन नसक्दा थप अन्यौलता कायम थियो । मन्त्रालयले महान्यायाधिवक्ताको कार्यालयसँग राय माग गरेको थियो । महान्यायाधिवक्ता कार्यालयले पुरानो कानूनी व्यवस्थाको अयोग्यता निष्क्रीय भएकाले त्यसरी वैदेशिक रोजगारीमा पठाउन नसकेका इजाजतपत्रवालाहरूको नवीकरण गर्नका लागि कुनै कानूनी बाधा नरहेको राय दिएको थियो ।
सोही आधारमा २६ साउनमा मन्त्रीस्तरीय निर्णय गर्दै श्रम मन्त्रालयले नवीकरण गराउन विभागलाई पत्राचार गरेको थियो ।

तपाईको प्रतिक्रिया

सम्बन्धित शीर्षकहरु