११ माघ/अर्थ र व्यापार – श्रम, रोजगार तथा सामाजिक सुरक्षामन्त्री शरतसिंह भण्डारीले आगामी दशकलाई आन्तरिक रोजगार प्रवद्र्धन दशकको रुपमा घोषणा गर्ने बताएका छन् ।
कानून, न्याय तथा मानव अधिकार समितिमा भएको केही नेपाल ऐनलाई संशोधन गर्न बनेको विधेयकको सम्बन्धमा श्रम, रोजगार तथा सामाजिक सुरक्षा मन्त्रालयसँग सम्बन्धित दफाहरुको छलफलमा मन्त्री भण्डारीले यस्तो बताएका हुन् ।
उनले आन्तरिक रोजगार सिर्जना गर्दै स्वरोजगारको निर्भरतालाई घटाउँदै लैजानकालागि श्रम रोजगार सम्मेलन गर्न लागेको बताए ।
‘आगामी फागुनमा श्रम रोजगार सम्मेलन गर्दैछौ, सम्मेलनमा वर्तमान सरकारले एउटा नीति दिएको छ । त्यही आधारमा आगामी दशकलाई आन्तरिक रोजगार प्रवद्र्धन दशकको रुपमा घोषणा गर्ने, त्यसकै आधारमा आन्तरिक रोजगार सिर्जना गर्ने लक्ष्य छ ’ उनले भने । यसैगरी, उनले अन्तिममा स्वरोजगारको निर्भरतालाई घटाउदैँ लिएर जाने भन्ने नीति अनुसार आन्तरिक रोजगार महाशाखा बनाएको बताए ।
त्यसैगरी, उनले श्रम मन्त्रालय वैदेशिक रोजगार हेर्न मात्र मन्त्रालय हो भन्ने मान्यता बसेको भन्दै यो मान्यता हटाउनकालागि आन्तरिक रोजगार महाशाखा स्थापना गरेको बताए ।
‘रोजगारीको कुरा उठ्ने वित्तिकै वैदेशिक रोजगारीको बारेमा नै छलफल गर्छौ, मन्त्रालयको काम नै वैदेशिक रोजगारी हेर्ने जस्तो भयो, त्यसकारण मन्त्रालयको संरचना नै परिवर्तन गरेका छौं’ उनले भने ।
‘पहिला के थियो भने वैदेशिक रोजगार संघ सम्बन्धी वैदेशिक रोजगार महाशाखा, विभाग, बोर्ड थियो । यस्तो हुँदा खाली वैदेशिक रोजगार हेर्न मात्र मन्त्रालय हो भन्ने मान्यता बसेको थियो । अहिले हामीले आन्तरिक रोजगार महाशाखा स्थापना गर्यौ । अब मन्त्रालयमा वैदेशिक रोजगार महाशाखा, आन्तरिक रोजगार महाशाखा स्थापना भएको छ । आन्तरिक रोजगार महाशाखाले देशभित्रको रोजगारीको सम्भावना हेर्छ’मन्त्री भण्डारीले भने ।
सो छलफलमा कानून, न्याय तथा संसदीय मामिलामन्त्री अजय कुमार चौरसियाले सामाजिक सुरक्षा कोषमा ११ प्रतिशत व्यक्ति, सम्बन्धित संस्था र रोजगारदाताले राख्ने र २० प्रतिशत सरकारले योगदान रकम राख्ने विषय राम्रो भएको भन्दै यो कार्य सफल हुने बताए ।
हाल सामाजिक सुरक्षा कोषको व्यवस्था गरिएको जानकारी गराउँदै उनले जसमा ११ प्रतिशत व्यक्ति, सम्बन्धित संस्था र रोजगारदाताले राख्ने र २० प्रतिशत सरकारले राख्ने भन्ने भएकाले नेपालमा काम गर्ने सबै व्यक्तिलाई त्यसमा आवद्ध गर्ने उद्देश्य मन्त्रालयसँग जोडिएको बताए ।