१० पुस/अर्थ र व्यापार– मंसिर महिनामा वैदेशिक रोजगारीमा जाने नेपाली कामदारको संख्या वृद्धि भएको छ । वैदेशिक रोजगार विभागका अनुसार मंसिर महिनामा ८४ हजार २ सय २६ जनाले वैदेशिक रोजगारीका लागि श्रम स्वीकृति लिएका छन् । गत वर्षको सोही महिनामा जम्मा ६२ हजार १ सय ४७ जना नेपाली कामदार मात्र भिभिन्न मुलुकमा गएका थिए ।
गत वर्षको तुलनामा यस वर्ष मंसिरमा २० हजार बढी नेपाली कामदार श्रम स्वीकृति लिएर वैद्यानिक रुपमा वैदेशिक रोजगारीमा गएका छन् । असोजको तुलनामा कात्तिक महिनामा केही कमी आए पनि मंसिर महिनामा वैदेशिक रोजगारीमा जाने नेपाली कामदारको संख्या बढेको छ ।

नेपालीका मुख्य चाडपर्व दसैं, तिहार र छठपर्व लगायतका चाड सकेर ठूलो संख्यामा नेपाली वैदेशिक रोजगारीमा गएको देखिएको विभागले जनाएको छ । प्रमुख राजनीतिक दलहरूले स्थिरता, सुशासन र स्वदेशमा नै रोजगारी सिर्जना गर्ने बताए पनि श्रम गर्ने उमेर समूहका कम युवा–युवतीले त्यसमा विश्वास नगरेको विभागले सार्वजनिक गरेको सो विवरणले प्रष्ट पारेको छ । चाडपर्वको महिना कात्तिकमा पनि करिब ५५ हजार नेपाली कामदार वैदेशिक रोजगारीमा गएका थिए ।
मंसिर महिनामा मात्र संस्थागत रुपमा म्यानपावर कम्पनीमार्फत २८ हजार ८ सय ६८ जना नेपाली कामदार वैदेशिक रोजगारीमा गएका छन् । विभागले सार्वजनिक गरेको मासिक प्रगति प्रतिवेदनअनुसार मंसिर महिनामा सबैभन्दा धेरै नेपाली कामदार यूएई गएका छन् । मंसिरमा संस्थागत रुपमा यूएई जान म्यानपावर कम्पनीमार्फत १४ हजार २८ जनाले श्रम स्वीकृति लिएका छन् । सो महिनामा २४ हजार ७६९ जना यूएई गएका छन् । कात्तिकमा सो संख्या १२ हजार ४८५ थियो ।
त्यसपछि नेपाली कामदारको रोजाई साउदी अरेबिया दोस्रो स्थानमा रहेको छ । सो मुलुकमा म्यानपावर कम्पनीमार्फत ६ हजार ७५३ जनासहित १८ हजार ११५ जना नेपाली कामदार गएका छन् । विभागद्धारा सार्वजनिक भएको प्रगतिववरण सूचीको तेस्रो स्थानमा रहेको कतार जान म्यानपावर कम्पनीमार्फत ३ हजार १ सय ११ जना सहित १४ हजार ८ सय ४४ जनाको श्रम स्वीकृति लिएको छ । कतारमा होटल क्षेत्रको अकुपेन्सी बढे पनि विश्वकप फुटबलपछि नयाँ रोजगारी सिर्जना हुन नसकेको सो विवरणबाट देखिएको छ ।
मंसिरमा मलेसियामा म्यानपावर कम्पनीमार्फत ४ जना, व्यक्तिगत २२ जना र पुनः श्रम स्वीकृति मार्फत ४ हजार ४६९ जनाको श्रम स्वीकृति भएको छ । कात्तिकमा ३ हजार ९७९ जना मलेसिया गएका थिए । मलेसियाबाट पुस महिनादेखि मात्र केही डिमान्ड आउन थालेको छ ।
खाडी मुलुक कुवेतमा मंसिरमा म्यानपावर कम्पनीमार्फत ३ हजार ११८ र समग्रमा ६ हजार ६९० जनाको श्रम स्वीकृति भएको छ । बहराइनका लागि ६१३ जनाको संस्थागत श्रम स्वीकृतिसहित समग्रमा १ हजार १८३ जनाको श्रम स्वीकृति भएको छ ।
युरोपीयन मुलुक साइप्रसमा म्यानपावरमार्फत ३७० जना महिला सहित समग्रमा ६६३ जना , जापानमा म्यानपावर कम्पनीमार्फत ११० जना र अन्य प्रक्रिया मार्फत गरि २ हजार ३७१ जना, जोर्डनमा म्यानपावरमार्फत ९४ जना सहित १३३ जना, मरिससमा म्यानपावरमार्फत १९५ जना सहित समग्रमा ६५३ जना गएका छन् । मंसिरमा क्रोएसियामा म्यानपावरमार्फत १ जना पनि गएका छैनन् तर, उक्त मुलुकमा व्यक्तिगत नयाँ १ हजार ११६ सहित कुल १ हजार ४११ जना गएका छन् । मंसिरमा माल्टा म्यानपावर कम्पनीमार्फत १ जना पनि गएका छैनन् भने व्यक्तिगत रूपमा १६४ र समग्रमा ४०७ जना, रोमानियाका लागि म्यानपावरमार्फत १४६ जना र व्यक्तिगत रूपमा १ हजार ६२६ सहित २ हजार ३४२ जनाको श्रम स्वीकृति भएको छ ।
क्यानाडा, माल्दिभ्स, पोल्यान्ड र बेलायतमा व्यक्तिगत श्रम स्वीकृतिमा गए पनि म्यानपावर कम्पनीले ती मुलुकमा पठाउन श्रम स्वीकृति लिन सकेका छैनन् । म्यानपावर कम्पनीले १४ मुलुकमा पठाउँदा व्यक्तिगत श्रम स्वीकृतिमा ९१ मुलुकमा नेपाली कामदार पुगेको विभागको तथ्यांकमा उल्लेख छ ।