२७ कात्तिक/अर्थ र व्यापार – नेपाल वैदेशिक रोजगार व्यवसायी संघले नेपालबाट वैदेशिक रोजगारीमा जाने नेपाली कामदारले महँगो दरमा हवाई टिकट खरिद गनुपरेको गुनासो गरेको छ । मंगलबार पत्रकार सम्मेलन गरि संघले सीमित वायुसेवाको मिलेमतोमा कृत्रिम अभाव खडा गरि हवाई भाडामा कालोबजारी गरिएको गुनासो गरेको हो । संघले यस्तो कामलाई कामदारमाथी भएको अपराध नै भनेको छ । 

संघले वैदेशिक रोजगारीमा जाने युवाहरुका लागि लागत शुल्क निर्धारण गर्नुपर्ने माग गरेको छ । हाल खाडीका केही मुलुक र मलेसियाका लागि फ्री भिसा फ्री टिकटको व्यवस्था रहेको छ । यसले गर्दा कामदार नै मर्कामा पर्ने गरेको संघको दाबी रहेको छ ।

नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले विभिन्न वायुसेवा कम्पनीहरूले सामान्य दिनमा ३० देखि ३५ हजार रुपैयाँमा नियमित पाउने टिकटलाई अहिले ७० देखि ८० हजार रुपैयाँ पु¥याएर दोब्बर मूल्यको टिकटमा नेपाली कामदार जान बाध्य भएको आरोप लगाए । 

संघका प्रथम उपध्याक्ष डिक बहादुर खत्री(कुमार)ले फ्रि भिसा फ्रि टिकटको प्रावधानले श्रमिक र राज्यलाई नै नोक्सान भएको बताए । उनले फ्रि भिसा फ्रि टिकटको प्रावधान ७ प्रतिशतमात्र कार्यन्वयन भएको दाबी गर्दै ९३ प्रतिशत श्रमिकले लाखौँ रकम तिर्न बाध्य भएको बताए । तसर्थ सेवा शुल्क तोक्नुपर्ने उनको भनाइ छ । म्यानपावर व्यवसायीले १० हजारको रसिद बनाएर लाखौँ रुपैयाँ लिने गरेको र सो रकम करको दायराभन्दा बाहिर भएकाले राज्यलाई पनि घाटा भएको उनको भनाइ छ ।उनका अनुसार कुनै पनि श्रमिकलाई खाडी मुलुक वा मलेसिया जाँदा न्यूनतम एक महिनाको तलब ४५ हजार रुपैयाँ सेवा शुल्क लागु गर्नुपर्ने र यसो गर्दा श्रमिक र राज्य फाइदा पुग्नेछ । 

संघका महासचिव मेघनाथ भुर्तेलले यस्तो चर्को भाडा नियन्त्रण लगायत वैदेशिक रोजगारीको क्षेत्र सुधार्न संघले राखेका विविध मागहरुका बारेमा जानकारी गराएका थिए । यसैगरी, उनले मागपत्र प्रमाणिकरण, हवाई भाडा बृद्धिको प्रभाव, जापान र कोरिया रोजगार सम्बन्धमा संघको तर्फबाट प्रस्तुत गरिएका धारणाबारे पनि जानकारी गराएका थिए । यसैगरी, मलेसिया लगायत देशमा महिला कामदार माग भएको भन्दै संघले सरकारले अध्ययन गरेर कामदार पठाउने व्यवस्था गर्नुपर्ने धारणा राखेको छ ।
त्यसैगरी, संघले जापान, इजरायल, दक्षिण कोरिया लगायत देशमा इजाजत प्राप्त संस्थाबाट कामदार पठाउन पाउने गरी कार्यविधि स्वीकृत गर्न समेत जोडदार माग गरेको जनाएको छ ।