२३ पुस/अर्थ र व्यापार – वैदेशिक रोजगार व्यवसायीहरू आफैले श्रमिकलाई वैदेशिक रोजगारीमा पठाउँदा लाग्ने लागत शुल्क प्रस्ताव गरेका छन् । सरकारले अभिमुखीकरण शुल्क लगायत सबै लागत खर्च बढाएर नयाँ नियम लागु गर्न लागेको भन्दै असन्तुष्टी जनाएका व्यवसायीले सरकारलाई यस्तो प्रस्ताव गरेका हुन ।
वैदेशिक रोजगार व्यवसायीको छाता संस्था नेपाल वैदेशिक रोजगार व्यवसायी संघले सोमबार पत्रकार सम्मेलन गर्दै वैदेशिक रोजगारीमा पठाउने नेपाली कामदारको लागत खर्च निर्धारण गर्न सरकारलाई दबाब दिँदै उनीहरूले यस्तो लागत शुल्क प्रस्ताव गरेका हुन्।
संघका अध्यक्ष राजेन्द्र भण्डारीले वैदेशिक रोजगारीको क्षेत्रलाई थप मर्यादित र कामदारलाई वास्तविक लागत खर्चमा पठाउन संघद्धारा प्रस्तावित यस्तो ‘खर्च शीर्षक’ निर्धारण गर्नुपर्ने बताए ।
उनले कामदारको शुल्क निर्धारण र व्यवसायीको सेवा शुल्क माग सम्बोधन गरेर कामदारलाई वास्तविक लागत खर्चमा पठाउने ग्यारेन्टी गर्न सकिने बताए । सम्बन्धीत देसको रोजगारदाताबाट रिकुटमेन्ट एजेन्सिलाई निर्धारित लागत खर्च प्राप्त भएमा कामदारबाट कुनै शुल्क नलिने भन्दै उनले तर, रोजगारदाता कम्पनीले नदिएको खण्डमा १ लाख ३२ हजार ७५४ रुपैयाँ लागत अनुमान शुल्क लिन पाउनुपर्ने व्यवसायीको माग रहेको बताए ।

संघका प्रथम उपाध्यक्ष डिकबहादुर खत्री (कुमार)ले संघद्धारा प्रस्तावित सो शुल्क निर्धारण गरेर व्यवसायीले सेवा शुल्क र निर्धारित खर्च कामदारले बेहोर्ने व्यवस्था भएमात्र लागत खर्च पारदर्शी हुने बताए । उनले कामदारको सो रकम कुनै वित्तीय संस्था तथा कोषसँग सम्झौता गरेर ती वित्तीय संस्थाले बेहोर्ने गरी व्यवस्था मिलाइनुपर्ने व्यवसायीको प्रस्ताव रहेको बताए ।
यसैगरी, संघका महासचिव मेघनाथ भुर्तेलले यदि रोजगारदाता कम्पनीले नदिएको खण्डमा यस्तो लागत खर्च रकम कामदारले वैदेशिक रोजगारमा गएर आर्जन गरेर तिर्ने व्यवस्था मिलाउनुपर्ने संघको माग रहेको बताए ।
पत्रकार सम्मेलन मार्फत संघरले पछिल्लो समय सरकारबाट भएको साउदी अरब दुतावास काठमाडौले कामदारलाई समय र पैसा दुवै भारपर्नेगरि अनिवार्य गरेको वायोमेट्रीक कुटनैतिक पहल गरि हटाउनुपर्ने, वैदेशिक रोजगार सचिवालयका कार्यकारी निर्देशक र मलेसियाको निजी कम्पनीबीच भएको सम्झौता खारेज लगायत विभिन्न १० बुँदे मार सरकार समक्ष राखेको छ । यो माग पुरा नभए आन्दोलनमा उत्रिने चेतावनी समेत संघले दिएको छ ।