२६ मंसिर/अर्थ र व्यापार – श्रम, रोजगार तथा सामाजिक सुरक्षा मन्त्रालयले पुनः ‘श्रमिकसँग श्रममन्त्री कार्यक्रम थालनी गरेको छ । गत ४ मंसिरमा सम्पन्न प्रतिनिधि सभा तथा प्रदेशसभा निर्वाचनका कारण केही समय स्थगित गरिएको सो कार्यक्रम श्रम मन्त्रालयले आइतबारदेखि पुनः सुरू गरेको हो ।
वैदेशिक रोजगारीमा रहेका नेपाली कामदारलाई विभिन्न देसको रोजगारदाता कम्पनीबाट हुने गरेको विविध समस्याबारे जानकारि लिएर तत्काल एक्सनमा जाने उदेस्यले सञ्चालिन श्रमिकसँग श्रममन्त्री कार्यक्रम आइतबार बिहान ११ बजेदेखि १२ बजेसम्म मन्त्रालयको कल सेन्टरमा सञ्चालन भएको थियो ।
वैदेशिक रोजगारीमा रहेका नेपाली कामदारलाई सिधै आफ्ना समस्या सरकारलाई सुनाउन सक्ने सहज व्यवस्था गरिएको ‘श्रमिकसँग श्रममन्त्री’ कार्यक्रममा श्रम, रोजगार तथा सामाजिक सुरक्षामन्त्री शेरबहादुर कुँवरलाई विभिन्न देशबाट आपतमा परेका नेपाली कामदारले फोनमार्फत प्रत्यक्ष आफ्ना गुनासा, समस्या एवं सुझाव राखेका थिए ।
सो कार्यक्रममा मन्त्री कुँवरसँग प्रत्यक्ष फोन मार्फत कुरा गर्दै देश विदेशबाट विभिन्न १० जना कामदारले आफ्ना गुनासा, समस्या र सुझाव राखेका थिए । सो बेला मन्त्रीसँग श्रमिकहरूले वैदेशिक रोजगारीमा ठगिएका सबैभन्दा बढी गुनासा र समस्या राखेका छन्।
मन्त्री कुँवरसँग श्रमिकले सम्झौताअनुसार विदेशमा आफूले तलब सुविधा नपाइएको, विदेश पठाउँछु भनेर ७ लाख ५० हजार रुपैयाँसम्म रकम लिएको गुनासा सुनाएका थिए ।
आइतबारको कार्यक्रममा टेलिफोन मार्फत मन्त्री कुँवरलाई दुवई, मलेसिया, साउदीलगायतका देशमा रोजगारीका लागि जाँदा ठगिएको गुनासा बढी सुनाएका थिए । एकजना श्रमिकले सुर्खेतबाट फोन गर्दै आफूलाई क्यानडा पठाइदिने भन्दै करिब ६ लाख रुपैयाँ ठगेको गुनासो मन्त्री कुँवरलाई सुनाएका थिए।
आइतबारको सो कार्यक्रममा विभिन्न समस्यामा परेका १० जना श्रमिकका गुनासा र समस्या सुनेपछि उनीहरुलाई जवाफ दिनेक्रममा मन्त्री कुँवरले वैदेशिक रोजगारीकालागि विदेश जानुपुर्व आफु जान लागेको देश, आफूले त्यहाँ पुगेर गर्ने काम, रोजगारदाता मुलुकबाट पाउने सेवा सुविधा, पठाउने म्यानपावर वा व्यक्तिबारे राम्ररी बुझनुपर्ने बताएका थिए । उनले कामदारलाई आफु विदेश जानुभन्दा अघि नै यस्ता सुविधाबारे राम्रो जानकारी लिने र यदि कसैलाई पैसा तिरेको भए त्यसको प्रमाण आफुसित सुरक्षीत राख्ने लगायतका कुरामा ध्यानु दिनुपर्नेमा जोड दिएका थिए ।
यसैगरि,मन्त्री कुँवरले श्रमिकका तत्काल समाधान हुने गुनासा र समस्याबारे सम्बन्धित निकायबाट समाधान खोजिने आश्वासन समेत दिए ।
सो कार्यक्रममा मन्त्री कुँवरले श्रमिकका समस्या र सवालबारे तत्कालै बुझेर समाधानका लागि पहल गरिदिन वैदेशिक रोजगार विभाग र वैदेशिक रोजगार व्यवस्थापन बोर्डका सम्बन्धित व्यक्तिलाई निर्देशन दिएका थिए । उनले यो कार्यक्रममा समस्यामा परेका नेपाली कामदारले कुनै डर र संकोच नमानिकन कुरा गर्न पाउने भएकाले जतिसक्दो छिटो लाभ लिन सम्बन्धीत सरोकारवाला एवं कामदारलाई आग्रह गरेका छन ।