११ फागुन/अर्थ र व्यापार– अमेरिकी राष्ट्रपति डोनाल्ड ट्रम्पको फ्लोरिडास्थित मार–ए–लागो निवासमा आइतबार जबर्जस्ती प्रवेश गर्न खोजेका एक २० वर्षीय युवकलाई किन सुरक्षाकर्मीले गोली हानेर मारे भन्ने खवरबारे अहिले धेरैको ध्यान खिचिएको छ ।
अमेरिकी राष्ट्रपतिको सुरक्षा गर्ने निकाय संयुक्त राज्य गुप्तचर सेवाले एक अज्ञात व्यक्तिले जर्बरजस्ती सुरक्षित क्षेत्रभित्र गैरकानुनी रूपमा प्रवेश गर्ने प्रयास गरेपछि सुरक्षाकर्मीले गोली चलाएका हुन् भनेको छ । सो घटना त्यहाँको स्थानीय समयअनुसार आइतबार बिहान १ः३० बजे भएको थियो । अन्तर्राष्ट्रिय समाचार एजेन्सिहरूमा अनुसार सो घटनामा समलग्न ती युवकको घटनास्थलमै मृत्यु भएको छ ।
अमेरिकी सुरक्षा निकायका अनुसार ति युवक एकनाले बन्दुक र इन्धनको भाँडो लिएर ट्रम्पको घरमा पुगेका थिए । सो घरको उत्तर प्रवेशद्वारबाट एउटा सवारीसाधन बाहिरिँदै गर्दा यि युवकले सवारीको आडमा भित्र छिर्न खोजेका थिए ।
त्यपछि अमेरिकी राष्ट्रपति निवासको सुरक्षामा खट्टिएका दुईजना सुरक्षाकर्मीले उनलाई रोकेर हतियार र इन्धनको भाँडो भुइँमा राख्न निर्देशन दिएका थिए । ति युवकले इन्धनको भाँडो राखेपनि बन्दुक चलाउने अवस्थामा उठाएपछि प्रतिकार स्वरुप सुरक्षाकर्मीले गोली प्रहार गरेका थिए ।
सुरक्षाकर्मीको गोली लागेर उनको मृत्यु भएको हो । सो घटनाका बेला राष्ट्रपति ट्रम्प भने वासिङ्टन डीसीस्थित ह्वाइट हाउसमा नै थिए । ट्रम्प प्रायः हरेक साताको अन्त्यमा आफ्नो निजी निवास मार–ए–लागोमा समय बिताउन पुग्थे ।
अमेरिकी सुरक्षाकर्मीको प्रारम्भिक अनुसन्धानअनुसार ति मृत व्यक्तिका परिवारले केही दिनअघि उनी हराएको भन्दै उजुरी दिएका थिए । उनी नर्थ क्यारोलाइनाबाट दक्षिणतर्फ आएका र बाटोमै बन्दुक किनेको खुलेको छ । उनको सवारीसाधनबाट बन्दुक राख्ने बाकससमेत फेला परेको सुरक्षाकर्मीले जनाएको छ । सो घटनाबारे थप अनुसन्धान जारी रहेको बताइएको छ ।
यसअघि पनि ट्रम्पमाथि आक्रमण प्रयास भएको थियो । सन् २०२४ को १३ जुलाईमा चुनावी सभाका क्रममा ट्रम्पमाथि गोली प्रहार भएको थियो । सो घटनामा गोली उनको कान छुँदै गएको थियो भने सुरक्षाकर्मीले हमलागर्ने व्यक्तिलाई तत्काल घटनास्थलमै नियन्त्रणमा लिएका थिए ।
अमेरिकी सुरक्षाकर्मीका अनुसार सो घटनामा संलग्न २० वर्षका अज्ञात व्यक्तिलाई ट्रम्पको मार–ए–लागो रिसर्टको उत्तरी गेटमा बन्दूक र इन्धन क्यान बोकेको अवस्थामा सुरक्षा कारबाही गरिएको थियो । सो घटनामा सुरक्षाकर्मीतर्फ कोही पनि घाइते भएका छैनन् । ती व्यक्तिले ट्रम्पसहित कैयौं व्यक्तिको हत्याको षड्यन्त्र वा प्रयासको निशाना रचेको अनुमान गरिएको छ ।
यसअघि अमेरिकी चुनावको दुई महिनाअघि सन् २०२४ सेप्टेम्बरमा फ्लोरिडाको ‘गल्फ कोर्स’मा राष्ट्रपतिको हत्याको षड्यन्त्र रचेका ५९ वर्षीय रायन राउथलाई आजीवन कारावासको सजाय सुनाइएको थियो ।
पेन्सिल्भेनियामा रिपब्लिकन नेतामाथि हत्याको प्रयास गरेको दुई महिनापछि राउथको योजनामा ट्रम्पमाथि आक्रमण भएको थियो ।