८ असोज/अर्थ र व्यापार – नेपाल र चीनबीच औषधि उत्पादनका लागि बनस्पति निर्यात गरिने लगायत विभिन्न १२ वटा सम्झौता भएको छ । यसैगरी, दुईमुलुकबिच एउटा समझदारी पनि भएको छ ।
चिन भ्रमणमा रहेका प्रधानमन्त्री पुष्पकमल दाहाल ‘प्रचण्ड’ र चिनियाँ प्रधानमन्त्री ली छ्याङको नेतृत्वमा सोमबार बेइजिङमा द्विपक्षीय वार्तापछि दुई देशबीच विभिन्न १२ बुँदे सम्झौता र एउटा समझदारी भएको हो।
विभिन्न मन्त्रालय अन्तर्गतका सम्झौतामा नेपालका तर्फबाट सम्बन्धित मन्त्रालयका सचिव र चीनका लागि नेपाली राजदूत विष्णुपुकार श्रेष्ठले हस्ताक्षर गरेका हुन्। चीनका तर्फबाट पनि सम्बन्धित अधिकारीले हस्ताक्षर गरेका छन्।
नेपालको उत्तरी क्षेत्रमा उत्पादकत्व वृद्धि गर्ने, डिजिटल अर्थतन्त्र बढाउने, व्यापार र भुक्तानी सम्झौताको समीक्षा र परिमार्जनका लागि संयुक्त प्राविधिक कार्यसमूह गठन गर्ने लगायत सम्झौता भएको छ ।
अर्थ मन्त्रालय र चीनको राष्ट्रिय विकास तथा सुधार आयोगबीच डिजिटल अर्थतन्त्र बढाउने विषयमा सहकार्यका लागि सम्झौता भएको हो। दुई देशबीच सन् १९८१ मा भएको चीन नेपाल व्यापार र भुक्तानी सम्झौताको समीक्षा र परिमार्जनका लागि संयुक्त प्राविधिक कार्यसमूह गठन गर्ने सम्झौतामा वाणिज्य तथा आपूर्तिसचिव मधुकुमार मरासिनी र चीनको वाणिज्य मन्त्रालयका अधिकारीले हस्ताक्षर गरेका छन्।
कृषि तथा पशुपन्छी विकास मन्त्रालय र चीनको कृषि तथा ग्रामीण सम्बन्ध मन्त्रालयबीच नेपालमा कृषि, पशुपन्छी र माछापालनको विकासका लागि सहकार्य गर्ने सम्झौता भएको छ। औषधि उत्पादनका लागि नेपालबाट चीनमा वनस्पति निर्यातसम्बन्धी सम्झौता भएको छ । जसमा कृषि तथा पशुपन्छी मन्त्रालयका सचिव डा. रेवतीरमण पौडेल र चिनियाँ अधिकारीले हस्ताक्षर गरे।
वन तथा वातावरण मन्त्रालय र चीनको राष्ट्रिय विकास तथा सुधार आयोगबीच हरित तथा न्यून कार्बन विकासका लागि सहकार्य गर्ने सम्झौता भएको छ।

राष्ट्रिय योजना आयोग र चीनको राष्ट्रिय विकास आयोगबीच सहकार्य गर्ने सम्झौता भएको छ। सम्झौतामा राष्ट्रिय योजना आयोगका उपाध्यक्ष डा. मीनबहादुर श्रेष्ठ र चिनियाँ अधिकारीले हस्ताक्षर गरे। प्राचीन ग्रन्थ अनुवाद र प्रकाशन गर्ने सम्झौतामा राजदूत श्रेष्ठ र चिनियाँ प्रेस तथा प्रकाशन विभागका अधिकारीले हस्ताक्षर गरेका छन्। शिक्षा, विज्ञान तथा प्रविधि मन्त्रालय र चीनको विज्ञान तथा प्रविधि मन्त्रालयबीच विज्ञान, प्रविधि र नवप्रवर्तनका क्षेत्रमा सहकार्य गर्ने सम्झौता भएको छ ।