२ साउन / अर्थ र व्यापार – तनहुँको पर्यटकीय नगरी बन्दीपुरमा आन्तरीक पर्यटकहरुको संख्या बढ्दै जान थालेको छ । भूकम्प र नाकाबन्दीका कारण थलिएको बन्दीपुरको पर्यटन व्यवसाय बिस्तारै तग्रिने अवस्थामा आएको छ । बन्दीपुरमा गत वर्षको दशैं पछि पर्यटकहरु बढ्न थालेका हुन् । असार महिनामा समेत पर्यटकहरु बन्दीपुरमा भेटिए । बन्दीपुरमा ९० प्रतिशत पर्यटकहरु आन्तरीक हुन्छन् भने १० प्रतिशत मात्रै विदेशी पर्यटक आउने गरेका छन् ।

विषेश गरी विकइन्ड मनाउन आन्तरीक पर्यटकहरु बन्दीपुर आउने गरेको छ । पर्यटकहरुको बसाई अवधि भने एक दिनको मात्रै हुने गरेको छ । बन्दीपुरमा ठूला–साना गरी ६० वटा होटलहरु सञ्चालनमा छन् । तिनमा ५ सय रुपैयाँदेखि १२ हजारसम्म पर्ने कोठाहरु छन् । बन्दीपुरमा ३ वटा नयाँ होटल यसै वर्ष थपिएका छन् भने ४ वटा ठूला होटल निर्माणको क्रममा छन् । होटलहरुमा ६ सय जनाले रोजगारी पाएका छन् ।

पर्यटकको आकर्षणको केन्द्र बन्दै गएपछि बन्दीपुरमा भ्यू टावर निर्माणको प्रक्रिया अघि बढेको छ । २ करोडको लगानीमा रानीवन क्षेत्रमा भ्यूटावर निर्माणको प्रक्रिया अघि बढेको छ । यहाँबाट एउटै रेञ्जमा धांउलागिरीदेखि लामटाङसम्मका ८ हजार उचाइभन्दा माथिका हिमालहरु देख्न सकिन्छ ।

यसैगरी बन्दीपुरमा तालपार्क निर्माणको योजना अघि बढेको छ । बन्दीपुरको गैह्रीगाउँमा तालपार्क निर्माणका लागि जग्गाको मुआब्जा दिने प्रक्रिया अघि बढेको छ । पार्क निर्माण हुने स्थानमा केही व्यक्तिको समेत जग्गा परेकाले त्यसलाई टुंग्याएर मात्रै काम शुरु गर्नुपर्ने हुँदा ढिला भएको छ ।

पानीको स्रोत नै नभएको ठाउँमा तालपार्क बनाउन लागिएको हो । बन्दीपुर गाउँपालिकाले बन्दीपुरमा रिङरोड निर्माण गर्न १ करोड ३० लाख रकम छुट्टाएको छ । यस्तै, गुरुन्चे डाँडाको पिकमा रहेका मन्दिरहरुको जीर्णोद्धार गरी त्यहाँ रहेको राजदरवारसम्म पुग्न फुट ट्र्याक निर्माणको काम गाउँपालिका र स्थानीय समुदायको साझेदारीमा अघि बढाउने तयारी भएको छ ।

यस्तै बन्दीपुरको टुँडीखेल क्षेत्रको गुरुयोजना तयार गरी फुटबल मैदान, फुटपाथ निर्माणको काम भैरहेको छ । हेलिप्याड निर्माण, कोसेली घर निर्माणको काम बाँकी छ । २ करोड ५० लाखको लागतमा ३ वर्ष्भित्र पूरा गर्ने गरी टुँडीखेलमा यी संरचनाहरु निर्माण गर्न लागिएको हो ।