सरकार भ्याट छुट दिन सक्ने अवस्थामा छैन: अर्थमन्त्री

144 पटक पढिएको

१५ भदौ/अर्थ र व्यापार – उपप्रधान तथा अर्थमन्त्री विष्णुप्रसाद पौडेलले अन्तर्राष्ट्रिय हवाई टिकटमा भ्याट छुट दिन नसक्ने बताएका छन् । उनले काठमाडौंमा सम्पन्न ट्रेकिङ एजेन्सिज् एसोसिएसन अफ नेपाल (टान) को ४७ औं वार्षिक साधारण सभा उद्घाटन गर्दै यस्तो बताएका हुन् । अर्थमन्त्री पौडेलले अहिलेको अवस्थामा सरकार भ्याट छुट दिन सक्ने क्षेमतामा नरहेको बताए ।
उनले पर्यटन व्यवसायीलाई भ्याट छुटको माग छोडेर व्यवसाय विस्तारका योजना ल्याउन आग्रह गरे। ‘राजस्वबाट साधारण खर्च धान्न नै अहिले मुस्किल छ । त्यसैले सरकारले हवाई टिकटमा भ्याट छुट दिन सक्दैन । अहिले भ्याट छुटभन्दा पनि व्यवसाय प्रवर्धनका कार्यक्रम ल्याउनुहोस्। सरकार आवश्यक सहजीकरण गर्न तयार छ,’ उनले भने।
उनले सरकार निजी क्षेत्रको आत्मविश्वास बढाउने र मुलुकमा लगानीको वातावरण सिर्जना गर्ने दिशामा काम गरिरहेको बताए ।
तत्कालीन अर्थमन्त्री डा. प्रकाशशरण महतले दुई वर्षअघि हवाई टिकटमा भ्याट लगाएका थिए। भ्याटका कारण टिकट महँगिंदा विदेशी पर्यटकहरु नेपालको साटो अन्य गन्तव्यमा जान थालेको व्यवसायीहरुले बताउँदै आएका छन् ।
ट्रेकिङ एजेन्सिज् एसोसिएसन अफ नेपाल (टान) का अध्यक्ष सागर पाण्डेले पर्यटन क्षेत्रको विकासका लागि नीतिगत सुधार र पूर्वाधार विकासमा सरकारले जोड दिनुपर्ने बताए । उनले सरकारले व्यावसायीलाई सहज वातावरण बनाउन नीतिगत सुधार र पूर्वाधार विकासमा ध्यान दिन आवश्यक भएको बताए ।
सो अवसरमा पर्वतीय पर्यटन विकासमा योगदान पु¥याउने विभिन्न संघ संस्था र सञ्चारकर्मीलाई सम्मान तथा पुरस्कार प्रदान गरिएको थियो । सो कार्यक्रममा पर्यटन क्षेत्रका विभिन्न संघ संस्थाहरूका प्रतिनिधीहरू पनि सहभागी भएका थिए ।

तपाईको प्रतिक्रिया

सम्बन्धित शीर्षकहरु