२० जेठ/अर्थ र व्यापार – विगतका वर्षहरुको तुलनामा अहिले विभिन्न देशबाट नेपाल भित्रिने पर्यटक आगमन संख्या उत्साहजनका रुपमा बढेको छ । हवाई मार्ग हुँदै मे महिनामा ९० हजार २ सय ११ जनाभन्दा बढी पर्यटक नेपाल भित्रिएका छन् ।
नेपाल पर्यटन बोर्डले यस्तो तथ्यांकबारे जानकारी गराएको हो । बोर्डले अन्तर्राष्ट्रिय विमानस्थलस्थित अध्यागमन कार्यालयको तथ्यांकलाई आधार मारेर यस्तो जानकारी गराएको हो ।
बोर्डका अनुसार मे महिनामा ९० हजार २ सय ११ जना पर्यटक हवाई मार्ग हुँदे नेपाल आएका हुन्। यो संख्या गत वर्षको सोही महिनाको तुलनामा १६ दशमलब १ प्रतिशतले बढी हो ।
समिक्षा अवधीमा सबैभन्दा धेरै पर्यटक भारतबाट आएका छन् । मे महिनामा ३८ हजार २ सय ८८ जना भारतीय पर्यटकले नेपाल भ्रमण गरेका छन्। यो संख्या गत वर्षको सोही महिनाको तुलनामा ४ दशमलब ७ प्रतिशतले धेरै हो ।
नेपालमा धेरै पर्यटक पठाउने देशको सूचीमा भारतपछि अमेरिका रहेको छ । मेमा ८ हजार ५२७ अमेरिकी नेपाल आएका हुन्। यो संख्या गत मे महिनाको तुलनामा ०.२ प्रतिशत कम हो।
चीनबाट ८ हजार ३८१ पर्यटक नेपाल आएका छन्। यो संख्या गत वर्षको सोही अवधीको तुलनामा ७९.६ प्रतिशत बढी हो । बंगलादेशबाट ३ हजार ४५८, बेलायतबाट २ हजार ८०२ र अस्ट्रेलियाबाट २ हजार १९४ पर्यटक भित्रिएको यस तथ्यांकमा उल्लेख छ । बंगलादेशका पर्यटक ५९.८ प्रतिशतले बढ्दा बेलायती पर्यटकको संख्या भने ४.३ प्रतिशतले घटेको छ।
यसैगरी, मलेसियाबाट गत वर्षको मे महिनाको तुलनामा यसपालि ३७.३ प्रतिशत बढी अर्थात १ हजार ८सय १४जनाले धेरै हो । त्यसैगरी, जर्मनीबाट १ हजार ३ सय ९२ जना र दक्षिण कोरियाबाट १ हजार ३सय ७३ जना पर्यटक नेपाल भित्रिएका छन्।
जर्मनी पर्यटकको संख्या १९.५ र दक्षिण कोरियाली पर्यटकको संख्या ३२.१ प्रतिशतले बढेको हो। समिक्षिा अवधीमा रसियन पर्यटकको संख्या ६०.७ प्रतिशतले बढेको छ। यो देशबाट मेमा १ हजार ४ सय ३७ पर्यटक नेपाल भ्रमणमा आएका हुन्।
यस्तै फ्रान्सबाट गत वर्षको मे महिनाको तुलनामा १७ प्रतिशत बढी अर्थात १ हजार २८४ पर्यटक आएका छन्। १ हजार भन्दा बढी पर्यटक आउने देशको सूचीमा जापान र भुटान पनि छन्। जापानी पर्यटकको संख्या ३५ र भुटानी पर्यटकको संख्या ४९.६ प्रतिशतले बढेको छ।
नेपाल पर्यटन बोर्डका प्रवक्ता मणिराज लामिछानेले अन्तर्राष्ट्रिय बजारमा गरेको प्रचार प्रसारले हवाई मार्गहुँदे नेपाल भित्रिने पर्यटकको आगमन वृद्धि भएको बताए। अहिले नेपाल प्रतिशत पुरानै अवस्थामा फर्किसकेको दावी गर्दै उनले भने, ‘चीनको बजारलाई अझ चुस्त बनाउनुपर्ने आवश्यकता छ।’ यसले पर्यटन व्यवसायीलाई थप उत्साह बढाएको उनले बताए ।