२७ मंसिर/अर्थ र व्यापार – लामो समय देखिएको कोरोना भाइरस महामारीको अवस्थामा समेत अहिले धमाधम होटलमा लगानी बढिरहेको पाइएको छ । कोरोनाले मुलुकको आर्थिक गतिविधिमा गम्भीर असर पुगेपछि अहिले लगानीकर्ताहरूको आकर्षण मुलुकको होटल तथा रेस्टुरेन्टमा देखिएको उद्योग विभागले जानकारी गराएको हो । 
उद्योग विभागमा पछिल्लो समय दर्ता भएका नयाँ उद्योगहरूको तथ्यांक विवरणअनुसार अहिले सबैभन्दा धेरै लगानी मुलुकको होटल उद्योगमा नै देखिएको छ । चालू आर्थिक वर्षको बितेका पाँच महिना साउनदेखि मंसिरसम्मको अवधिमा २१ वटा होटल दर्ता भएका छन् । 
विभागको तथ्यांकअनुसार सो अवधिमा १५ अर्ब लगानी गर्ने भनिएका यी होटलमा १ हजार ६ सय ४८ बेड हुने लक्ष्यसहितको योजना पेस भएका छन् । सो अवधिमा साना, मध्यम तथा ठूला तारे होटल दर्ता भएका छन् । अरू उद्योग व्यवसायमा जमिरहेका समूह घरानादेखि नयाँ तथा विदेशी लगानीकर्ताले समेत अहिले होटलमा नै लगानी गर्ने इच्छा व्यक्त गरेका छन् । 
मुलुकलाई राम्रो कर बुझाउने पुरानो कम्पनी सूर्य नेपाल प्रालिले पनि अहिले काठमाडौंमा होटल सञ्चालन गर्नका लागि उद्योग विभागमा फाइल दर्ता गरेको छ । ५ अर्ब ९९ करोड लगानी  गरेर १ सय ९० बेडको होटल सञ्चालन गर्ने सूर्य नेपालको योजना रहेको छ । यसैगरी, चलचित्र मन्दिर तथा मनोरञ्जन क्षेत्रमा जमिरहेका पुराना व्यवसायी उद्धव पौडेलले पनि हाल काठमाडांैको चाबहिलको गोपीकृष्ण हल भएकै ठाउँमा होटलसहितको संरचना निर्माण गर्ने भएका छन् । गोपीकृष्ण सेन्ट्रल कम्प्लेक्स प्रालि उद्योग उनले दर्ता गराएका छन् । 
२ अर्ब ६७ करोड ६३ लाख लगानी हुने यो परियोजनाअन्तर्गत २५० बेडसहितको होटल हुने छ । त्यस्तै, काठमाडौंमै ग्रिन भ्यु प्रालिले १ अर्ब लगानीमा ६० बेडको होटल सञ्चालन गर्ने भन्दै उद्योग दर्ता गराएको छ । मोरङमा ९९ सय बेडको होटल सञ्चालन गर्न नेपाल इन्टरनेसनल हस्पिटालिटीले उद्योग दर्ता गरेको छ ।
सन् २०१० पछि होटलमा लगानीकर्ताको आकर्षण बढिरहेको छ । सन् २०१० पछि बढेको लगानीको तीव्रता २०१५ को भूकम्पले केही धकेलिए पनि त्यसपछि काठमाडौंमै नयाँ पाँचतारे होटल सञ्चालनमा आए । पछिल्लो समय काठमाडौंमा दुई ठूला पाँचतारे होटल सञ्चालनमा आइसकेका छन् । म्यारियट, काठमाडौं र अलफ्ट काठमाडौंमा सञ्चालन भएका नयाँ पाँचतारे होटल हुन् । त्यस्तै, चन्द्रागिरि हिल्स रिसोर्ट पनि पछिल्लो समय सञ्चालनमा आएको ठूलो होटल परियोजना हो । काठमाडौं बाहिर पनि मेची क्राउन प्लाजा, भैरहवामा टाइगर प्यालेस, नेपालगन्जमा सोल्टी वेस्टेन्ड प्रिमियर सञ्चालनमा आएका छन् । 
सरकारको तथ्यांकअनुसार गत आर्थिक वर्ष २०७७÷७८ को अन्तिमसम्म कुल होटलको संख्या १ हजार ३ सय १३ पुगेको छ । सरकारबाट अनुमति लिएर सेवा दिइरहेका यस्ता होटलमा कुल ४५ हजार ८ सय ५० बेड पुगेका छन् । यसमा तारे होटल १ सय ४२ पुगेका छन् भने तारा नलिएका होटलको संख्या ११ सय ७१ वटा रहेको छ । यसमा रिसोर्टको संख्या अलग छ । पर्यटन विभागका अनुसार हालसम्म एकतारे होटलको संख्या ३४ छ । एकतारे होटलमा कुल १ हजार ३ सय ४४ बेड छन् । त्यस्तै, दुईतारे स्तरका होटल ४१ छन् । दुईतारे होटलमा २ हजार ८ सय ८० बेड छन् । 
३४ तीनतारे होटलमा ३ हजार ४ सय १२ बेड छन् भने १९ चारतारे होटलमा २ हजार ४ सय ८७ बेड छन् । १५ पाँच तारे होटलमा एउटा सञ्चालनमा छैन भने एउटा पाँचतारे डिलक्स होटल छ भने तीनवटा हेरिटेज बुटिक होटल छन् । त्यस्तै, नेपालमा ९९ रिसोर्ट छन् भने एउटा डिलक्स र एउटा लक्जरी रिसोर्ट रहेको छ । कोरोना महामारीको प्रभावित भएका होटल परियोजनाले पनि पछिल्लो समय निरन्तरता पाएका छन् । काठमाडौं उपत्यकामै निर्माणाधीन होटल परियोजना धमाधम निर्माण भइरहेका छन् । काठमाडौं बाहिरका पर्यटकीय गन्तव्यमा पनि होटलमा धमाधम लगानी थपिएको छ । कोरोना महामारीपछि पर्यटक आगमन बढ्ने तर पुराना परियोजनाबाट माग सम्बोधन नहुने अनुमानसहित व्यवसायीहरू अहिले होटलमा लगानी गर्न आकर्षित देखिएका छन् । पछिल्लो समय चौधरी ग्रुप, गोल्छा अर्गनाइजेसन, गोल्यान ग्रुपजस्ता प्रतिष्ठित व्यापारिक समूह होटल व्यवसायतर्फ आकर्षित भएका छन् भने हिल्टन, मेरियट, सेराटनजस्ता अन्तर्राष्ट्रिय चेन सञ्जाल रहेका ठूला होटल कम्पनीहरूले समेत धमाधम नेपालमा लगानी बढाएका छन् ।