६ पुस/ अर्थ र व्यापार  - पोलिमर नोट छपाईमा अनियमितता भएको भन्दै अख्तियार दुरुपयोग अनुसन्धान आयोगले पूर्व गभर्नर तिलक रावलसहित तीन जना विरुद्ध मुद्दा दर्ता गरेको छ । बिहीबार उनीहरुविरुद्ध विशेष अदालतमा मुद्दा दर्ता गराएको आयोगका प्रवक्ता रामेश्वर दंगालले जानकारी दिए । रावलविरुद्ध ९१ लाख रुपैयाँको बिगो दावी गरिएको छ । त्यसैगरी नेपाल राष्ट्र बैँकका तत्कालीन नोट विभाग प्रमुख उपेन्द्रकेशरी पौड्याल र मे फ्लावर लिमिटेडका तर्फबाट लोकल एजेन्ट हिमालयबहादुर पाँडेविरुद्ध पनि उति नै रुपैयाँ बिगो दावी गरिएको छ । 

यो विषयमा अस्ट्रेलिया सरकारको करप्सन एन्ड क्राइम कमिसनले पनि अस्ट्रेलियाको संघीय प्रहरीलाई छानबिन गर्न लगाएको थियो । सिडनी मर्निङ हेराल्डले हिमालय पाँडेले नेता र राष्ट्र बैँकका अधिकारीहरुलाई आर्थिक प्रलोभनमा पारेको खबर प्रकाशित गरेपछि त्यहाँ छानबिन सुरु भएको थियो ।  अस्ट्रेलिया सरकारले आग्रह गरेपछि नेपाल सरकारले हिमालयबहादुर पाँडे, रामराज्यलक्ष्मी पाँडे, पृथ्वीबहादुर पाँडे, उपेन्द्रकेशरी पौडेल, केशव खत्री र तिलक रावलबारे जानकारी पठाएको थियो । पोलिमर नोट छाप्न नेपाल राष्ट्र बैँकले आर्थिक वर्ष २०५८र५९ मा अनुमति दिएको थियो । 

नेपाल राष्ट्र बैंकले अष्ट्रेलियामा रु १० को ५ करोड थान पोलिमर नोट छपाई गर्दा अष्ट्रेलियाको स्थानीय एजेन्टमार्फत आर्थिक लेनदेन गरेको, गुणस्तरहीन नोट छपाई भएको, नोट प्रिन्टिङ अष्ट्रेलियासँग गैर कानुनी मिलेमतो पाइएको अभियोगपत्रमा उल्लेख छ ।

नेपाल राष्ट्र बैंकले नोट प्रिन्टिङ अष्ट्रेलियासँग बोलपत्रका मस्यौदा लिने, संचालक समितिका निर्णय चुहाउने, जर्मन कम्पनीसँगको साँचो, नोट प्रिन्टिङ अष्ट्रेलियालाई हस्तान्तरण गर्न लगाउने, नेपाल राष्ट्र बैंक र नोट प्रिन्टिङ अष्ट्रेलिया तथा त्यसका स्थानीय प्रतिनिधि बीचका निरन्तर पत्राचार हुने, छापिएका नोटका कमिकमजोरी मिडियामा नल्याउनका लागि मिडियाकर्मीहरुलाई थाइल्यान्ड हुँदै अष्ट्रेलिया पठाउने, नोट छपाईका लागि जसलाई पछि कार्यादेश दिइएको आयोगले जानकारी दिएको छ । 
बोलपत्र पूर्व नै नोटको डिजाइन गर्न लगाउने, बोलपत्रका क्रममा स्थानीय प्रतिनिधिको प्रभावमा राजस्व छल्ने नियतले कमिसन उल्लेख नगर्ने, परल मूल्य प्रति हजार अस्ट्रेलियन डलर ६८ बाट अस्ट्रेलियन ४ बढाउन लगाई सोही बमोजिम बोलपत्र र सम्झौता गरी नेपाल राष्ट्र बैंकका एवं नोट प्रिन्टिङ अष्ट्रेलियाका पदाधिकारीहरु र त्यसका स्थानीय प्रतिनिधिले नेपाल राष्ट्र बैंकलाई अस्वभाविक मूल्य तिराई नोक्सानी पुर्याुई आफू समेतलाई फाइदा पुग्ने कसुर गरेको अभियोग पत्रमा उल्लेख छ।