२८ असोज/अर्थ र व्यापार – माथिल्लो दोर्दी ‘ए’ जलविद्युत आयोजनाको परीक्षण उत्पादन बिहिबारदेखि सुरु गरेको छ । लिबर्टी इनर्जी कम्पनीले लमजुङमा निर्माण पूरा गरेको २५ मेगावाटको आयोजनाबाट परिक्षणका लागि विद्युत उत्पादन सुरु गरेको हो ।
रन अफ द रिभरमा आधारित सो आयोजनाले २०७१ मा विद्युत उत्पादन अनुमति पाएको थियो । आयोजनाबाट २०७६ साल चैतदेखि विद्युत उत्पादन गर्ने लक्ष्य रहेतापनि समयमा प्रसारण लाइन निर्माण नहुँदा, विश्वव्यापी रूपमा फैलिएको कोरोना माहामारी तथा बाढी–पहिरोका कारण उत्पादन तालिका धकेलिँदै आएको थियो ।
विभिन्न प्राकृतिक प्रकोपका समस्याहरू झेल्दै बल्ल विद्युत उत्पादनको चरणमा पुगेको कम्पनीका सञ्चालक राजेन्द्र वस्तीले बताए । योजना अनुसार परीक्षण उत्पादन सफल भएमा कातिकदेखि नै व्यावसायिकरूपमा बिजुली उत्पान सुरु आयोजनाले जनाएको छ ।
लमजुङको दोर्दी गाउँपालिका वडा नं ६ ढोडेनी भएर बग्ने दोर्दी खोलामा निर्मित आयोजना पूरा गर्न सुरुमा ४ अर्ब ६४ करोड ६१ लाख रुपैयाँ लागत अनुमान गरिएको थियो । विभिन्न समस्याहरू समाधान गर्दै आउनु परेका कारण हाल लागत करिब ५ अर्ब रुपैयाँ पुगेको आयोजनाले जानकारी दिएको छ ।
आयोजनाबाट वार्षिक १३ करोड ६७ लाख ८४ हजार ८ सय ९६ युनिट विद्युत उत्पादन हुने छ । विद्युत उत्पाद सुरु भएको पहिलो वर्षमा करिब ८० करोड रुपैयाँ आम्दानी प्रक्षेपण गरिएको छ । आयोजनाको बिजुली हिउँदको समयमा आठ रुपैयाँ ४० पैसा र वर्षायाममा चार रुपैयाँ ८० पैसा हुने गरी प्रवद्र्धक कम्पनी लिवर्टी र विद्युत् प्राधिकरणबीच विद्युत् खरिद बिक्री सम्झौता (पिपिए) भएको छ ।
आयोजनामा १२ दशमलव पाँचका दुईवटा गरी २५ मेगावाटको बिजुली उत्पादन हुने भएको छ । दोर्दी कोरीडोरमा माथिल्लो दोर्दी ‘ए’ सँगै ५४ मेगावाटको सुपर दोर्दी ‘ख’, १२ मेगावाटको दोर्दी–१ लगायत आयोजना निर्माणाधीन छन् ।
२७ मेगावाटको दोर्दी खोलाबाट भने यसअघि नै उत्पादन सुरु भइसकेको छ । लिबर्टी इनर्जी कम्पनी लिमिटेडले लमजुङमा निर्माण पूरा गरेको २५ मेगावाटको माथिल्लो दोर्दी ‘ए’ जलविद्युत आयोजनाको बिहीबारदेखि परीक्षण उत्पादन सुरु भएको छ ।
त्यस्तै, दोर्दीखोला जलविद्युत् कम्पनीले निर्माण गरिरहेको १२.१ मेगावाटको दोर्दी–१, छयाङ्दी खोला हाइड्रोपावर कम्पनीको चार मेगावाट क्षमताको जलविद्युत् आयोजना रहेका छन् । यीमध्ये २७ मेगावाटको दोर्दीखोला, छयाङ्दीखोला हाइड्रोपावर कम्पनीको चार मेगावाट क्षमताको जलविद्युत् आयोजनाको बिजुली राष्ट्रिय प्रसारण लाइनमा जोडिसकेको छ ।
यो आयोजना विसं २०७१ बाट निर्माण थालनी गर्दै विसं २०७४ मा निर्माण सम्पन्न गर्ने लक्ष्य आयोजनाको थियो । तर विनासकारी भूकम्पपछिको अघोषित नाकाबन्दी र विसं २०७६ भदौमा आएको बाढीका कारण निर्धारित समयमा निर्माण सम्पन्न हुन सकेन । सम्झौता अनुसार आयोजनाको निर्माण सम्पन्न गर्न नसक्दा पटक–पटक म्याद थप गर्दै हाल आएर निर्माण कार्य पुरा भएको छ ।