२४ असार/अर्थ र व्यापार– नेपालका लागि निसान गाडीको आधिकारीक वितरक पायोनियर मोटोकर्पले नेपाली बजारमा विद्युतीय कार निसान लिफ सार्वजनिक गरेको छ । बुधबारबाट गाडीको बुकिङ समेत खुलेको छ ।

आधिकारीक वितरक पायोनियर मोटोकर्पले बुधबार विद्युतीय कार निसान लिफको भर्चुअल कार्यक्रममार्फत सार्वजनिक गरेको हो । नेपाली वजारमा ‘बोल्ड प्रिमियम लुक्स’ र अत्याधुनिक फिचरका साथ निसान लिफ नेपाली बजारमा आएको हो ।

निसान ब्राण्डको फ्लेगसिप र सतप्रतिशत विद्युतीय कार अल न्यु निसान लिफमा उत्कृष्ट पर्फमेन्स, स्मार्ट र इन्टेलिजेन्ट ड्राभिङ अनि शून्य कार्बन उत्सर्जन क्षमता भएको कम्पनीले बताएको छ ।

पाँच सिटको ह्याचब्याक कार निसान अत्याधुनिक, उर्जा दक्षता र एरोडाइनमिक डिजाइनयुक्त निसान लिफको एक्सटेरियर लुक्सले बलियो ब्राण्डको झलक दिन्छ । निसान लिफ इन्टेलिजेन्ट ड्राइभिङ, पावर र इन्टिग्रेसनको उदाहरणीय समायोजन रहेको कम्पनीले बताएको ।

सतप्रतिशत विद्युतीय र शून्य कार्बन उत्सर्जनको मूल उद्देश्य बोकेका निसान लिफको चार्जिङ सुविधा काठमाडौंमा निसानको हरेक डिलरसिपमा उपलब्ध छ । यसमा ८ वर्षको ब्याट्री र १ लाख ६० हजार किलोमिटर दूरीको ग्यारेन्टी छ ।

यसको स्ट्याण्डर्ड मोडलमा १४७ हर्सपावरको विद्युतीय मोटर र ४० किलोवाटको ब्याट्री छ । यसले प्रतिघण्टा १४४ किलोमिटरको दूरी तय गर्दछ । एक पटकको फूल चार्जमा यो गाडी ३११ किलोमिटरसम्म चल्न सक्छ ।

निसान लिफले १४८ बीएचपीको पावर र ३२० एनएमको टर्क दिन्छ । गाडीभित्र रहेको ७ इन्चको कलरफूल कस्टमाएबल एमोलेड डिस्प्लेमा पावर मिटर, चार्ज टाइम, र इन्फोटेन्मेन्ट जस्ता उपकरण राखिएका छन् । सी सेग्मेन्टका इन्धनबाट सञ्चालन हुने कारको तुलनामा यो ३० प्रतिशत कम नै शान्त छ ।

यस गाडीमा भएको इपेडल प्रविधिका कारण एउटा पेडलबाटै चलाउन सकिन्छ । एउटै पेडलले ब्रेक र एक्सिलेरेटरको काम गर्दछ । इलेक्ट्रिक एक्सिलेन्सको स्वाद पस्कने निसान लिफको मूल्य भने ५९ लाख ९९ हजार नेपाली रुपैयाँ रहेको छ ।