१६ पुस /अर्थ र व्यापार - गत साता ४९ अंकले बढेको शेयर बजार परिसूचकमा आइतबारपछि साताको दोस्रो दिन सोमबार पनि गिरावट आउँदा २७.८८ अंकको करेक्शन देखिएको छ । आइतबार दोहोरो अंकले घटेको नेप्से सूचकले सोमबार पनि निरन्तरता पाएको हो ।

शेयर बजारका लगानीकर्ताहरु स्थीर हुन नसक्दा र बजारमा अल्पकालीन कारोबारीको हाबीका कारण सूचक माथि जान खोजेपनि सकिरहेको छैन । बजार अलिकति माथि जाने वित्तीकै पाकेको नाफा सुरक्षित गर्नतर्फ लगानीकर्ताको जोडबल हुँदा सूचक निरन्तर दबाबमा पर्दै आएको छ । सोमबार पनि बजार परिसूचक नेप्से १७.२६ अंकले घटेर ११८७.२८ बिन्दुमा झरेको छ । साथै कारोबार रकममा पनि आइतबारको तुलनामा थप पाँच करोड ३९ लाख रुपैयाँले कमी आएको छ । बजार खुलेको करिब १४ मिनेट मात्र सकारात्मक रहेको बजार त्यसपछि माथि चढ्न सकेन र निरन्तर घट्दै उच्च अंकले घट्न पुग्यो । सोमबार १६७ कम्पनीका ११ लाख ७९ हजार ४३ कित्ता शेयर ४० करोड ३ लाख रुपैयाँ बराबरमा किनबेच भएका छन् । आइतबार १०.६२ अंकले घटेको बजारमा ४५ करोड ४२ लाख रुपैयाँ बराबरको कारोबार भएको थियो ।

यस दिन ‘क’ वर्गका कम्पनीको सूचक मापन गर्ने सन्सेटिभ इन्डेक्स ३.८४ अंकले घटेर २५२.१७ बिन्दुमा झरेको छ । कारोबारमा आएका उपसूचक मिश्रीत देखिएका छन् । तीनवटा सूचकमा हरियाली छाएको छ भने सात सूचक ऋणात्मक बनेको छ । १० उप सूचक मध्ये उत्पादन तथा प्रशोधन, हाइड्रोपावर र फाइनान्स समुह सकारात्मक देखिए । सबै भन्दा धेरै उत्पादन तथा प्रशोधन समुहको ७.१३ अंकले बढेको छ । यस्तै हाइड्रोपावरको ६.९५ र फाइनान्स १.३९ अंकले सुधारिएका छन् ।

यस दिन सबैभन्दा धेरै निर्जीवन बीमा समुहको १६०.२३ अंकले घटेको छ । जीबन बीमा समुहको उप सूचक पनि १५३ अंकले ओरालो लागेको छ । यस्तै माइक्रोफाइनान्स २३.५८, होटल १९.२७, बैंकिङ्ग १४.९४, विकास बैंक १३, अन्य समुहको १०.४८ अंकले ओरालो लागेका छन् ।

सोमबार नेशनल लाइफ इन्स्योरेन्सको सबैभन्दा धेरै रकमको शेयर कारोबार भएको छ । इन्स्योरेन्सको २ करोड ८८ लाख रुपैयाँ बराबरको कारोबार भएको हो । यस्तै नेपाल बैंक लिमिटडको २ करोड ३८ लाख रुपैयाँ, नेपाल लाइफ इन्स्योरेन्सको २ करोड ३१ लाख, छिमेक लघुवित्तको १ करोड ९७ लाख र एनएमबी बैंकको १ करोड ४४ लाख रुपैयाँ बराबरको कारोबार भएको छ । लुम्बिनी जनरल इन्स्योरेन्स, नागरिक लगानी कोष, प्राइम लाइफ इन्स्योरेन्सको एक करोड रुपैयाँ भन्दा बढीको कारोबार भएको छ । यस्तै एनसीसी बैंकको ९८ लाख र मेगा बैंकको ८५ लाख रुपैयाँ बराबरको कारोबार भएको छ ।