१९ पुस /अर्थ र व्यापार - साताको अन्तिम दिन बिहिबार शेयरबजार झिनो अंकले घटेको छ भने कारोबार रकममा भने सामान्य सुधार आएको छ । बुधबार २५ करोड रुपैयाँ बराबरको कारोबार भएको बजारमा विहिबार २७ करोड रुपैयाँ भन्दा बढीको कारोबार भयो । बिहिबार नेप्से १.५६ अंकले घटेर ११७८.८७ बिन्दुमा झरेको छ । १५८ कम्पनीका ७ लाख ९७ हजार ६१३ कित्ता शेयर किनबेच भएर २७ करोड ६९ लाख रुपैयाँ बराबरको कारोबार भयो । यस दिन ‘क’ वर्गका कम्पनीको सूचक मापन गर्ने सेन्सेटिभ इन्डेक्स ०.४८ अंकले घटेर २५०.०६ बिन्दुमा झरेको छ ।

कारोबारमा आएका नौं उप सूचक मिश्रीत देखिएका छन् । छ वटा सूचकमा हरियाली छाएको छ भने बाँकी तीन सूचक ऋणात्मक बनेको छ । नौं उप सूचक मध्ये जीवन बीमा, होटल, निर्जीवन बीमा माइक्रोफाइनान्स र फाइनान्स र अन्य समुह सकारात्मक देखिए । सबै भन्दा धेरै जीवन बीमा समुहको ६८.०५ अंकले बढेको छ । यस्तै होटल १८.२५, निर्जीवन १५.०२, माइक्रोफाइनान्स १.२२, फाइनान्स ०.३८ र अन्य समुहको सुचक ०.३ अंकले सुधारिएका छन् ।

यस दिन सबैभन्दा धेरै हाइड्रोपावर समुहको ६.३७ अंकले घटेको छ । यस्तै विकास बैंकको ६.१८ र बाणिज्य बैंकको सुचक ४.३६ अंकले ओरालो लागेका छन । बिहिबार नेपाल बैंकको सबै भन्दा धरै रकमको शेयर कारोबार भएको छ । बैंकको २ करोड ६१ लाख रुपैयाँ बराबरको कारोबार भएको हो । यस्तै एनटिसीको १ करोड ६६ लाख, नेपाल लाइफ इन्स्योरेन्सको १ करोड ३७ लाख, नेपाल लाइफ इन्स्योरेन्सकै संस्थापक शेयर १ करोड २६ लाख र एनसीसी बैंकको १ करोड १३ लाख रुपैयाँ बराबरको कारोबार भएको छ । अन्य कुनै पनि कम्पनीको कारोबार रकम भने करोड नाघ्न सकेन ।

युनाइटेड मोदी हाइड्रोपावरको शेयरमुल्य सबैभन्दा धेरै ५ प्रतिशतले बढेको छ । सिन्धु विकास बैंकको ४.८८, रिडी हाइड्रोपावरको ४.१७ र अपि पावरका शेयरमूल्य ३.९२ प्रतिशतले बढेको हो । यस्तै मिर्मिरे लघुवित्त, समता माइक्रोफाइनान्स, ङादी ग्रुप, मिथिला लघुवित्त, नेरुडे लघुवित्त, नेशनल माइक्रोफाइनान्सका शेयरधनीहरुले २ प्रतिशत भन्दा बढीले कमाएका छन् ।
यता कालिका लघुवित्तको शेयरधनीहरुले सबैभन्दा धेरै ६.९७ प्रतिशतले गुमाएका छन् । यस्तै हाथवे फाइनान्सको ४.७६ प्रतिशत र साइनरेसुङ्गा विकास बैंकको शेयर मूल्य ४.३८ प्रतिशतले घटेका छन् ।

यसैगरी नगबेली, आँखु खोला र एभरेष्ट इन्स्योरेन्स्सका शेयरधनीहरुले ३ प्रतिशत भन्दा बढीले गुमाएका छन् । काबेली विकास बैंक, बरुण हाइड्रोपावर, सर्पोट माइक्रोफाइनान्स र प्रुडेन्सियल इन्स्योरेन्सको शेयरमुल्य २ प्रतिशत भन्दा बढीले घटेका छन् ।