२० माघ /अर्थ र व्यापार  - साताको पहिलो कारोबार दिन आइतबार नै नेप्से सूचक ८.५७ अंकले घटेको छ । कारोबारमा आएका ११ उप सूचकमध्ये ब्यापार बाहेक बाँकी सबै १० वटै उपसूचक ऋणात्मक बन्दा नेप्से झण्डै दोहोरो अंकले घटेर ११५३.०६ अंकमा झरेको छ । कारोबार सुरु भएदेखि नै ओरालो यात्रा समातेको आइतबारको नेप्से सूचक निरन्तर आरोलो लागेर बन्द भएको हो । कारोबारमा आएका उप सूचकमध्ये व्यापार २.८७ अंकले सकारात्मक बनेको छ भने निर्जीबन र जीबन दुबै बीमाका सूचक धेरै अंकले घटेका छन् ।

आइतबार १५ लाख २७ हजार ७०६ कित्ता शेयर ४१ करोड ५७ लाख ७३ हजार रुपैयाँमा खरिद बिक्री भएका छन् । गत बिहीबारको तुलनामा कारोबार रकम भने १४ करोड २४ लाख रुपैयाँले बढेको हो । बिहीबार १६८ कम्पनीका ९ लाख ७ हजार कित्ता शेयर २७ करोड ३३ लाख रुपैयाँमा खरिद बिक्री भएको थियो ।

घट्दो बजारमा माछापुच्छ्रै बैंकको संस्थापक उच्च कारोबार भएको छ । बैंकको पाँच लाख २२ हजार ५५ कित्ता शेयर ११३ रुपैयाँका दरले खरिद बिक्री हुँदा ५ करोड ९३ लाख ५४ हजार रुपैयाँ बराबरको शेयर कारोबार भएको हो । यस्तै दोस्रो ठूलो कारोबार नेपाल टेलिकमको भएको छ । टेलिकमको ३ करोड ५५ लाख बराबरको कारोबार भयो । अपर तामाकोशी हाइड्रोपावरको २ करोड ५० लाख, नबिल बैंक संस्थापक दुई करोड ४६ लाख, छिमेक लघुवित्त एक करोड ४७ लाख, नेपाल बैंक एक करोड ३९ लाख, एनएबि बैंक एक करोड ३४ लाख, नागरिक लगानी कोष एक करोड २७ लाख, नेपाल इन्भेष्टमेन्ट बैंक एक करोड १३ लाख र प्रभु बैंकको ९२ लाख ८० हजारको शेयर खरिद बिक्री भएको छ ।

घट्दो बजारमा पनि यसदिन १६९ कम्पनीको शेयर कारोबारमा आएकोमा २७ कम्पनीका शेयरधनीले भने आइतबारको बजारबाट कमाएका छन् । गत आवको पुस मसान्तको तुलनामा करिब दोब्बर नाफा कमाएको विजय लघुवित्तको शेयरमूल्य सबैभन्दा धेरै ३.८३ प्रतिशतले बढेर प्रतिकित्ता ७०५ रुपैयाँ पुगेको छ । जनउत्थान सामुदायिक लघुवित्त, सूर्योदय, कालिका लघुवित्त, एभरेष्ट इन्स्योरेन्स, विशाल बजार कम्पनी, तिनाउ विकास बैंकको शेयरमूल्य करिब २ प्रतिशतले बढेको छ । पञ्चकन्या माई हाइड्रोपावर, हाथवे र जेविल्स् फाइनान्सको शेयरमूल्य पनि १.५० प्रतिशत माथि उक्लेको छ ।उता सानिमा इक्वीटी फण्डका इकाइधनीले आइतबारको बजारमा सबैभन्दा धेरै गुमाएका छन् । फण्डको ३.७९ प्रतिशतले घटेर ८ रुपैयाँ ८७ पैसा कायम भएको छ ।

आरम्भ माइक्रोफाइनान्सको शेयरधनीले पनि ३ प्रतिशतले गुमाएका छन्। अरुण भ्याली हाइड्रोपावर, महालक्ष्मी विकास बैंक, अरुण काबेली, हिमालयन पावर पार्टनर, स्वदेशी लघुवित्त, नेपाल टेलिकम, रैराङ्ग हाइड्रोपावर, र मिसन डेभलपमेन्ट बैंकको शेयरमूल्य पनि दुई प्रतिशत बढीले घटेको छ ।