२८ माघ/ अर्थ र व्यापार - सोमबार नेप्से १.३४ अंकले सुधार आउदा ११२८.८६ बिन्दुमा पुगेको छ । यस दिन १६६ कम्पनीका ६ लाख ८७ हजार ३३६ कित्ता शेयर किनबेच हुँदा २० करोड २७ लाख रुपैयाँ बराबरको कारोबार भयो । सोमबार नेप्से परिसूचक झिनो सुधार भएको बजारमा कारोबार रकम भने घटेको छ । आइतबार दोहोरो अंकले घटेर २३ करोड ५१ लाख रुपैयाँ बराबरको कारोबार भएको शेयर बजारमा सोमबार करिब ३ करोड कम कारोबार भएको हो ।

कारोबारमा आएका १० उपसूचक मध्ये आठ सकारात्मक बनेका छन् भने २ सूचक ऋणात्मक देखिएका छन् । जीवन बीमा समुहको सूचक सबैभन्दा धेरै २४.४२ अंकले बढेको छ । विकास बैंक१३.७१, होटल्स् १३.३४, माइक्रोफाइनान्स १०.४५, निर्जीवन बीमाको सूचक १०.२१ अंकले बढेका छन् । यस्तै हाइड्रोपावर २.४४, फाइनान्स २.४ र अन्य समुहको सूचक पनि २.३६ अंकले सकारात्मक रहे ।

यता उत्पादन तथा प्रशोधन समूहको सूचक सबैभन्दा धेरै १०.२४ अंकले ऋणात्मक भएको छ । यस्तै वाणिज्य बैंकको सूचक पनि १.४८ अंकले ओरालो लागेको छ । सोमबार अपर तामाकोशी हाइड्रोपावरको सबैभन्दा धेरै कारोबार भएको छ । तामाकोशीको ६१ हजार १३ कित्ता शेयर एक करोड ४० लाख रुपैयाँ बराबरको कारोबार हुदाँ अन्य कुनै पनि कम्पनीको कारोबार रकम करोड नाघ्न सकेन ।

यस दिन एनसिसी बैंकको ९३ लाख रुपैयाँ, एनएमबि बैंकको ८२ लाख ८५ हजार रुपैयाँ, नेपाल लाइफ इन्स्योरेन्सको ८० लाख ३७ हजार रुपैयाँ बराबरको कारोबार भयो । नबिल बैंक प्रमोटर ७१ लाख ८६ हजार तथा प्रभु बैंक, नेशनल लाई र नेपाल इन्स्योरेन्सको पनि ५० लाख बढीको शेयर कारोबार भयो ।
यस दिन चौतारी लघुवित्तको शेयरमूल्य सबै भन्दा धेरै ९.८९ प्रतिशतले बढेको छ । कालिका पावर कम्पनीका शेयरधनीले ७.७८ प्रतिशत, श्री इनभेष्टमेन्ट फाइनान्सका शेयरधनीले ५.४७ प्रतिशतले कमाएका छन् । यस्तै सानाकिसान विकास बैंक, रैराङ्ग हाइड्रोपावर, महिला सहयात्री माइक्रोफइनान्सको शेयर मुल्य ३ प्रतिशत भन्दा बढीले बढेका छन् ।

यता बरुण हाइड्रोपावरको शेयर मल्य सबैभन्दा धेरै ७.५१ प्रतिशतले घटेको छ । यस्तै सिद्धार्थ इनस्योरेन्स, कर्पोरेट डेभलपमेन्ट बैंक, एनएलजी इन्स्योरेन्सका शेयरधनीहरुले २ प्रतिशत भन्दा बढीले गुमाएका छन् । यस्तै युनिलिभर नेपाल, छ्याङदी हाइड्रोपावर, सानिमा इक्वुटी फण्डको इकाई मुल्य, किसान माइक्रोफाइनान्स, कालिका लघुवित्त, सिभिल लघुवित्तको शेयर मुल्य १ प्रतिशत भन्दा बढीको घटेको छ ।