सेयर बजारले २७ सय नाघ्यो

78 पटक पढिएको

२५ असार/अर्थ र व्यापार– यस साताको चैथो कारोबार दिन बुधबार फेरि सेयर बजारले २७ सय अंक नाघेको छ । अघिल्लो दिनको तुलनामा यसदिन सेयर बजार परिसूचक नेप्से २२ दशमलब ०४ अंकले बढेर २७ सय ०५ दशमलब ९० विन्दुमा पुगेको छ ।
१ सय ९९ वटा कम्पनीको सेयरमूल्य बढेको छ । ४९ वटा कम्पनीको सेयरमूल्य घटेको छ । यसदिन कारोबार रकम पनि अघिल्लो दिनको भन्दा केही बढेको छ । अघिल्लो दिन ६ अर्ब ५७ करोडको कारोबार भएकोमा बुधबार ७ अर्ब ४५ करोड १८ लाख ७७ हजार १ सय २ रुपैयाँको सेयर कारोबार भएको छ ।
यसदिन बैंकिङ उपसमूहमा लगानीकर्ताको आकर्षण देखिएको छ । बैंकिङ उपसमूहको सेयरमूल्य सबैभन्दा धेरै १ दशमलब ६८ प्रतिशतले बढेको छ । त्यस्तै विकास बैंक उपसमूहको ०.३४ प्रतिशत, होटल तथा पर्यटन उपसमूहको ०.२८ प्रतिशत, हाइड्रोपावर उपसमूहको ०.५४ प्रतिशतले बढेको छ ।
लगानी उपसमूहको १.३७, जीवन बीमा ०.२४, उत्पादन तथा प्रशोधन ०.९५, माइक्रोफाइनान्स ०.८५, निर्जीवन बीमा ०.२४, अन्य ०.३० तथा व्यापार ०.३४ प्रतिशत बढे ।
फाइनान्स उपसमूहको ०.३८ प्रतिशत घट्यो । बरुण हाइड्रोपावरको मूल्य सबैभन्दा धेरै ६.२१ प्रतिशत बढ्यो । पन्चकन्या माइ हाइड्रोपावरको ४.२८, एनआईसी एसिया बैंकको ३.९३, सीईडीबी होल्डिङ्सको ३.८८, न्यादी हाइड्रोपावरको ३.७४ प्रतिशत मूल्य बढ्यो ।
सेयर मूल्य धेरै बढेका वाणिज्य बैंकमा एनआईसी एसियापछि माछापुच्छ्रे, लक्ष्मी सनराइज, कृषि विकास, सिटिजन्स, ग्लोबल आईएमई, प्रमु र कुमारी क्रमशः छन् ।
ग्रिन डेभलपमेन्ट बैंकको ४.४१ प्रतिशत मूल्य घट्यो । पिपुल्स हाइड्रोपावरको २.७७, राप्ती हाइड्रोको २.४४ तथा खानीखोला हाइड्रोको २.२९ प्रतिशत घट्यो ।
यसदिन धेरै कारोबार भएका कम्पनीमा राधि विद्युत्, बुटवल पावर, एनआरएन इन्फ्रास्ट्रक्चर, गार्डियन माइक्रोलाइफ इन्स्योरेन्स र नेपाल पुनर्बीमा कम्पनी क्रमशः अगाडि छन् ।

तपाईको प्रतिक्रिया

सम्बन्धित शीर्षकहरु

सेयर बजार उत्साह, लगानीकर्ताको आकर्षण बैंकमा