१५ फागुन/अर्थ र व्यापार – यस साताको अन्तिम कारोबार दिन बिहीबार सेयर बजार परिसूचक नेप्से अघिल्लो दिनको तुलनामा ४९ दशमलब १५ अंकले बढेको छ । सो वृद्धिपछि नेप्से २८ सय १५ दशमलब ४ विन्दुमा कायम भएको छ ।
यसदिन सेयर कारोबार रकम पनि अघिल्लो दिनको भन्दा बढेको छ । अघिल्लो दिन ९ अर्ब ९० करोडको कारोबार भएकोमा बिहीबार ११ अर्ब ३९ करोड २४ लाख १ हजार ८ सय १५ रुपैयाँको सेयर कारोबार भएको छ ।
१ सय ८६ वटा कम्पनीको सेयर मूल्य बढ्ेको छ । ५२ वटा कम्पनीको सेयर मुल्य घट्यो भने ६ वटा कम्पनीको स्थिर रहेको छ ।
यसदिन बैंकिङ उपसमुहको सेयर मुल्य सबैभन्दा धेरै ३ दशमलब ३२ प्रतिशतले बढेको छ । विशेषगरि नेपाल राष्ट्र बैंकले गत मंगलबार सार्वजनिक गरेको चालु आर्थिक वर्षको मौद्रिक नीतिको अर्धवार्षिक समीक्षाले असल ऋणमा गर्दै आएको नोक्सानी व्यवस्थापन (प्रोभिजनिङ) लाई १ प्रतिशतमै झारेको छ । यसअघि यस्तो नोक्सानी १दशमलब १० प्रतिशत थियो। मौद्रिक नीतिको अर्धवार्षिक समिक्षा मार्फत राष्ट्र बैंकले बैंक तथा वित्तीय संस्थाहरुको असल कर्जाको प्रोभिजनिङ घटाएसँगै नाफा बढाउन मद्दत पुग्ने भएकाले लगानीकर्तामा सकारामक प्रभाव परेका कारण बिहीबार बैंकिङ उपसमुहको सेयरमा आकर्षण देखिएको हो ।
राष्ट्र बैंकले गरिदिएको मौद्रिक नीतिको नयाँ व्यवस्थाले अब बैंकहरुको आगामी वित्तीय विवरणमा नाफा बढ्ने अनुमान गरिएको छ । सोही अनुमानकै कारण यसदिन बैंकिङ उपसमुहको सेयर मुल्य यसरी बढेको नेपाल स्टक एक्सचेन्ज लिमिटेडले जनाएको छ ।
यसदिन कारोबारमा आएका विभिन्न १३ वटा उपसमुहमध्ये सबै उपसमुहको सेयर मुल्य सूचक बढेका छन् । सर्वाधिक बढेको बैंकिङ उपसमुहपछि उत्पादन उपसमुहको सेयर मुल्य २ दशमलब ९१ प्रतिशतले बढेको छ ।
यसैगरी, व्यापार उपसमुहको सेयर मुल्य १ दशमलब २० प्रतिशत , अन्य उपसमुहको १ दशमलब ०१ प्रतिशत, निर्जीवन बीमा उपसमुहको सुन्य दशमलब ७० प्रतिशत , माइक्रोफाइनान्स उपसमुहको सुन्य दशमलब ९१ प्रतिशत, जीवन बीमा उपसमुहको सुन्य दशमलब ८१ प्रतिशत, लगानी उपसमुहको १ दशमलब २५ प्रतिशत , हाइड्रोपावर उपसमुहको १ दशमलब ८० प्रतिशत, होटल तथा पर्यटन उपसमुहको १ दशमलब १२ प्रतिशत, फाइनान्स उपसमुहको सुन्य दशमलब २८ प्रतिशत र विकास बैंक उपसमुहको १ दशमलब ५३ प्रतिशतले सेयर मुल्य बढेको छ ।
यसदिन कारोबारमा आएका कुल ३ सय वटा कम्पनीहरु मध्ये ४ वटा कम्पनीको सेयर मूल्य १० प्रतिशतले बढेको छ । गार्डियन माइक्रोलाइफ इन्स्योरेन्स, अपरहेवाखोला, सिन्धु विकास बैंक र दोर्दीखोला हाइड्रोपावरको सेयर मूल्य १० प्रतिशतले बढेको छ । लिबर्टी इनर्जीको सेयर मूल्य ९ दशमलब ९६ प्रतिशत , गुराँस लघुवित्तको ९ दशमलब २४ प्रतिशत , बोटलर्स नेपाल बालाजुको ८ दशमलब ९९ प्रतिशतले सेयर मूल्य बढेको छ ।
बिहीबार हिमालयन रि इन्स्योरेन्सको सेयर सबैभन्दा धेरै ९६ करोड ४७ लाख रुपैयाँ बराबरको कारोबार भएको छ । त्यसपछि धेरै कारोबार भएका कम्पनीहरुमा नेपाल पुनर्बीमा, एनआरएन इन्फ्रास्ट्रक्चर, सिंगटी हाइड्रोपावर र कुमारी बैंक क्रमशः अगाडि रहेको छ ।
सबै सूचक हरियाली भएर बढ्दापनि यसदिन भूगोल इनर्जीको सेयर मुल्य ७ दशमलब १७ र उपकार लघुवित्तको सेयर मुल्य ६ दशमलब २५ प्रतिशतले घटेको छ ।