१३ मंसिर/अर्थ र व्यापार – यस साताको अन्तिम कारोबारदिन बिहीबार सेयर बजारमा सामान्य अंकको करेक्सन देखिएको छ । यसअघि लगातार तिनदिन बढेको सेयर बजार अघिल्लो कारोबार दिनको भन्दा बिहीबार सेयर बजारको परिसूचक नेप्से ८.३० अंकले घटेर २७ सय ४८ विन्दुमा झरेको छ ।
यसदिन सेयर बजार घट्दा कारोबार रकम पनि अघिल्लो दिनको भन्दा केही घटेको छ । अघिल्लो दिन सेयर बजारमा ९ अर्ब ३१ करोड रुपैयाँ बढीको सेयर कारोबार भएको थियो । यसदिन ८ अर्ब ५४ करोड ५५ लाख २५ हजार ३७३ रुपैयाँको सेयर कारोबार भएको छ ।
कारोबारमा आएका कुल ३ सय ७ वटा कम्पनीहरु मध्ये यसदिन जम्मा ४९ वटा कम्पनीको मूल्य बढेका छन् भने १९५ वटाको सेयर मुल्य घटेको छ । यसदिन सेयर बजारलाई व्यापार उपसमुहको विशाल बजार कम्पनीले मात्र उचालेको देखिन्छ ।
बिहीबार व्यापार उपसमूहको ९.२५ प्रतिशत सेयर मुल्य बढ्यो । विशाल बजार कम्पनीको मूल्य १० प्रतिशत बढ्दा व्यापार समूह ९ प्रतिशत बढेको हो । नेपाल स्टक एक्सचेन्जका अनुसार व्यापार उपसमूहमा साल्ट ट्रेडिङ लिमिटेड र विशाल बजार कम्पनी मात्र सूचीकृत छन् । पूँजीकरणका आधारमा साल्ट ट्रेडिङ भन्दा विशाल बजार कम्पनी १० गुणा शक्तिशाली छ । सोही कारण व्यापार उप समूहलाई विशाल बजारले पूर्ण प्रभाव पार्ने गरेको छ ।
त्यसपछि विकास बैंकउपसमुहको सूचक १.०५ प्रतिशतले बढेको छ र अनि जीवन बीमा उपसमुहको ०.४७ प्रतिशतले बढेको छ ।
यसदिन बैंकिङ उपसमुहको ०.८७ प्रतिशत , फाइनान्स ०.९७ प्रतिशत , होटल तथा पर्यटन ०.८० प्रतिशत, हाइड्रोपावर १.५८प्रतिशत, लगानी उपसमुहको ०.८७ प्रतिशत , उत्पादन ०.८६, माइक्रोफाइनान्स ०.६२ प्रतिशत , निर्जीवन बीमा ०.५४प्रतिशत र अन्य समूह १.४१ प्रतिशतले घटेको छ ।
बिहीबार विशाल बजार कम्पनी, विन नेपाल लघुवित्त र सपोर्ट माइक्रोफाइनान्सको मूल्य १० प्रतिशत बढ्यो । पाँचथर पावरको ८.३, लाइफ इन्स्योरेन्स कर्पोरेसनको ८.१, जानकी फाइनान्सको ७.८, मितेरी विकास बैंकको ५.३ प्रतिशतले सेयर मूल्य बढ्यो ।
यसदिन सबैभन्दा धेरै मानुषी लघुवित्तको सेयर मूल्य १० प्रतिशतले घट्यो । अपर स्याङ्गे हाइड्रोपावरको ८.६ प्रतिशत र कर्णाली विकास बैंकको ६.८ प्रतिशत मूल्य घट्यो । कारोबार रकमका आधारमा एक्सल डेभपमेन्ट बैंक, नेपाल फाइनान्स, मितेरी डेभलपमेन्ट बैंक, जानाकी फाइनान्स र ङादी ग्रुप पावर क्रमशः अगाडि रहेको छ ।
यो कारोबार दिनलाई लगानीकर्ताले नेपाल राष्ट्र बैंकले शुक्रबार सार्वजनिक गर्न लागेको चालु आर्थिक वर्षको मौद्रिक नीतिको समिक्षा के कस्तो आउँदै छ भन्नेतर्फ बढी ध्यान दिएको देखिएको छ ।