२५ कात्तिक/अर्थ र व्यापार – यो साताको पहिलो कारोबार दिन आइतबार सेयर बजार उच्च अंकले बढेर नेप्से २७ सय ३८ अंक नाघेको छ । अघिल्लो कारोबार दिनको तुलनामा आइतबार नेप्से परिसूचक ६२ दशमलब ५४ अंकले बढेर २७ सय ३८ दशमलब सून्य ६ बिन्दुमा आइपुगेको छ ।
यस दिन २ सय २८ वटा कम्पनीको सेयर मूल्य बढेका छन् । १३ वटा कम्पनीको सेयर मुल्य घट्यो भने ३ वटाको स्थिर रह्यो । यस दिन झन्डै १० अर्बको सेयर कारोबार भएको छ । आइतबार कुल ९ अर्ब ७७ करोड ११ लाख २४ हजार ७३ रुपैयाँको सेयर खरिदविक्री भएको छ ।
अघिल्लो कारोबार दिन जम्मा ५ अर्ब २२ करोडको मात्र कारोबार भएको थियो । नेपाल स्टक एक्सचेन्जका अनुसार यसदिन सबै समुहका सूचक बढेका छन् । हाइड्रोपावर उपसमुहको सेयर मुल्य सबैभन्दा धेरै ४ दशमलब २६ प्रतिशतले बढेको छ । यसैगरी, बैंकिङ उपसमुहको १ दशमलब ६२ प्रतिशत , विकास बैंक उपसमुहको २ दशमलब ७१ प्रतिशत, फाइनान्स उपसमुहको २ दशमलब ४८ प्रतिशत सेयर मुल्य बढेको छ ।
त्यस्तै, होटल तथा पर्यटन उपसमुहको सुन्य दशमलब ९६ प्रतिशत , लगानी उपसमुहको २दशमलब ५६ प्रतिशत, जीवन बीमा उपसमुहको २ दशमलब १६ प्रतिशत, उत्पादन क्षेत्र उपसमुहको २ दशमलब ३२ प्रतिशत , माइक्रोफाइनान्स उपसमुहको १ दशमलब ५१ प्रतिशत, निर्जीवन बीमा उपसमुहको १ दशमलब ९५ प्रतिशत, अन्य समुह २ दशमलब ५२ प्रतिशत र व्यापार समूहको १ दशमलब १५ प्रतिशतले सेयर मुल्य बढेको छ ।
आइतबार ६ वटा कम्पनीको सेयर मूल्य १० प्रतिशतले बढेको छ । यसदिन गुराँस लघुवित्त, सिर्जनशील लघुवित्त, सुपरमादी हाइड्रोपावर, बलेफी हाइड्रोपावर, नारायणी डेभलपमेन्ट बैंक र समृद्धि फाइनान्सको सेयर मूल्यमा सर्किट लागेर १० प्रतिशत बढेको थियो । यसैगरी, इस्टर्न हाइड्रोपावरको ९ दशमलब ५ प्रतिशत , पिपुल्स पावरको ९ दशमलब सुन्य प्रतिशत, मैलुङखोलाको ९ दशमलब सुन्य प्रतिशत ,माउन्टेन हाइड्रो नेपालको ८ दशमलब ८ प्रतिशतले सेयर मूल्य बढेको छ ।
कारोबार रकमका आधारमा सानिमा जीआईसी इन्स्योरेन्स, समृद्धि फाइनान्स, ङादी ग्रुप, एचआईडीसीएल प्रमोटर र साहस ऊर्जा क्रमशः अगाडि रहेका छन् । यसैगरी, यसदिन समाज लघुवित्तको ४ दशमलब ८ प्रतिशत , मिथिला लघुवित्तको ४दशमलब १ तथा कुथेली बुकरी स्मल हाइड्रोपावरको ३ प्रतिशतले मूल्य घट्यो ।
यसअघिका केहीदिन सेयर बजार घटेको थियो । यसदिन समग्रमा नेप्सेले हाफ सेन्चुरी भन्दा बढीको सूचक ६२ दशमलब ५४ अंकको ह्याटिक हानेको हो । आइतबार नेप्सेले लिएको यो उचाई पछिल्लो दुई महिनायताकै सर्वाधिक हो । यसअघि गत १९ भदौमा नेप्से २७ सय ३९ दशमलब ४६ विन्दुमा थियो।
यसदिन सबै उपसमूहले सेयर बजार हरियो भएका थिए । सोही कारण यसदिन २२८ वटा कम्पनीका सेयर लगानीकर्ताले कमाएका छन् भने १३ वटा कम्पनीका लगानीकर्ताले गुमाएका छन् । यसदिनको सेयर बजारमा कारोबार रकम पनि गत भदौ पछिको सबैभन्दा धेरै हो । यसअघि गत ३० भदौमा १० अर्ब ३३ करोड रुपैयाँको सेयर खरिदविक्री भएको थियो ।