१२ कात्तिक/अर्थ र व्यापार– अपि पावर कम्पनीले गत आर्थिक वर्षको मुनाफाबाट सेयरधनीलाई वितरण गर्ने लाभांश प्रस्ताव पारित गरेको छ । आइतबार काठमाडौमा सम्पन्न कम्पनीको २१ औं वार्षिक साधारण सभाले सेयरधनीलाई ५ प्रतिशत बोनस सेयर बाँड्ने प्रस्ताव पारित गरेको हो ।
सो साधारण सभाले आर्थिक वर्ष २०८०/०८१ को वार्षिक प्रतिवेदनमा छलफल गर्दै पारित गरेको हो । साधारण सभाले लेखापरिक्षकको प्रतिवेदन सहित आर्थिक वर्ष २०८०/०८१ को वासलात, नाफा नोक्सान हिसाब र नगद प्रवाह लगायतका वित्तिय विवरणहरुलाई सेयरधनीहरु समक्ष छलफल गर्दै पारित गरेको छ ।
यस साधारण सभाले विशेष प्रस्तावको रुपमा कम्पनीको आर्थिक वर्ष २०८०/०८१ सम्मको जगेडा कोष तथा सेयर प्रिमियम बाट प्राप्त मुनाफाबाट ५ प्रतिशत बोनस सेयर र कर प्रयोजनको लागि ०.२६३२ प्रतिशत नगद लाभांस वितरण गर्ने प्रस्ताव पारित गरेको छ ।
यसैगरी, यस अघि घोषणा भएको ९ दशमलब ५१३५ प्रतिशत दिने भनिएको लाभांसबाट बाँकी रहेको ४.२५०३ प्रतिशतले हुने रकम कम्पनीको जगेडा कोष कायम रहने पनि कम्पनीका अध्यक्ष सिर्जना खड्काले सो साधारण सभामा जानकारी गराएकी थिइन ।
सो साधारण सभाले लेखापरिक्षकको नियुक्ति तथा पारिश्रमिक निर्धारण पनि गरेको छ । सोही साधारण सभामा अपि पावरले सहायक कम्पनी अपि इन्फ्रा लिमिटेड कम्पनीमा एकसय प्रतिशत सेयर स्वामित्व रहने गरी लगानी गर्ने प्रस्ताव अगाडी सारेका थिए । सो कम्पनीले ललितपुरको झम्सिखेलमा अवस्थित ४३ इकाई सहितको ९ तले आवासीय भवन बनाउने काम अगाडी बढाइसकेको बताएको छ ।
यस बाहेक अपि पावरको बहुमत सेयर स्वामित्व रहने गरी लटिनाथ पावर कम्पनी लिमिटेड कम्पनीमा लगानी गर्ने न्वागाड साना जलविद्युत आयोजना (९.७ मे.वा) निर्माण गर्ने प्रस्ताव पनि सो सभाले पारित गरेको छ ।
यसैगरी, अपिपावर कम्पनी लिमिटेडले सुदुर पश्चिम प्रदेशमा रहेको दार्चुला पावर कम्पनी लिमिटेड कम्पनीमा लगानी गरी मध्य चमेलिया जलविद्युत आयोजना (२८. ३ मे.वा) निर्माण गर्ने प्रस्ताव पनि सो सभाबाट अनुमोदन गराएको जनाएको छ ।
त्यसैगरी, अपि पावरले अपिको बहुमत लगानी रहेको सुर्यकुण्ड हाइड्रो इलेक्ट्रिक लिमिटेड कम्पनीमा लगानी गरि माथिल्लो तादी खोला जलविद्युत आयोजना (११ मे.वा) को निर्माण अन्तिम चरणमा रहेको र सो लगानी अनुमोदन गर्ने प्रस्ताव पनि अनुमोदन गरिसकेको सो कम्पनीले जनाएको छ ।
जसकालागि सुर्यकुण्ड हाइड्रो इलेक्ट्रिक लिमिटेडले सर्वसाधारणमा आईपीओ निष्काशन गर्न नेपाल धितोपत्र बोर्डमा आवेदन दिसकेको छ ।
यस कम्पनीले सर्वसाधारण सेयरधनीबाट ३ जना सञ्चालकमा मधुसुदन कोइराला, संजिव न्यौपाने र द्धावारिका न्यौपाने नियुक्त भएका छन् भने महिला संचालकमा सिर्जना खड्का नियुक्त भएकी छिन् ।
कम्पनीले लेखा परीक्षकमा शिशिर बी एण्ड एसोसिएट्सलाई निरन्तरता दिंदै पारिश्रमिक कर बाहेक ५ लाख रुपैयाँ तोकेको छ। ९.७ मेगावाट क्षमताको न्वागाढ जलविद्युत् आयोजनाको बहुमत सेयरमा लगानी गर्ने सञ्चालक समितिको निर्णय पनि साधारण सभाले अनुमोदन गरेको छ ।
अहिले लटिनाथ पावर लिमिटेडले यो आयोजनाको सम्भाव्यता अध्ययन गरिरहेको छ। अपि पावरको साधारण सभाले न्वागाढ जलविद्युत् आयोजना निर्माणका लागि आवश्यक कर्जा लिन जमानी बस्ने निर्णय समेत गरेको छ । यसैगरी, साधारण सभाले २८.३ मेगावाट क्षमताको जलविद्युत् आयोजना विकास गरिरहेको दार्चुला पावर प्रालिको बहुमत सेयर खरिद गर्ने र आयोजना निर्माण तथा संचालनका लागि आवश्यक कर्जा लिन जमानी बस्ने निर्णय गरेको कम्पनीले जनाएको छ ।
साधारण सभाले चार जना संचालक छानेको छ । सिर्जना खड्का, संजिव न्यौपाने, द्वारिकाप्रसाद न्यौपाने र मधुसुदन कोइराला सञ्चालकमा दोहोरिएका छन् । स्वतन्त्र संचालक छान्ने जिम्मा साधारण सभाले संचालक समितिलाई दिएको छ । संचालक समितिको सोमबार बिहान बसेको बैठकले खड्कालाई अध्यक्ष चुनेको छ ।