२२ फागुन/अर्थ र व्यापार – अर्थमन्त्रीको टुंगो नलागेपछि मंगलबार सेयर बजारमा भारी गिरावट आएको छ । नेपाल स्टक एक्सचेञ्ज का अनुसार मंगलबार नेप्से परिसूचक ३.३८ प्रतिशत अर्थात् ७०.३१ अंकले घटेर २००७.६९ अंकमा बन्द भएको थियो ।
सोमबार अकस्मात सत्ता गठबन्धन परिवर्तन भएपछि ६ प्रतिशतले बढेको सेयर बजार मंगलबार भने भारी अंकले गिरावट आएको हो । सोमबार नेप्से परिसूचक ११७.७० अर्थात ६ प्रतिशतले बढेर २०७८ बिन्दुमा पुगेको थियो । एक दिन अगाडि सकारात्मक सर्किट लागेको पुँजी बजारमा दोस्रो दिन नै उच्च अंकले गिरावट आएको हो ।
सोमबार गठबन्धन परिवर्तन हुँदा अर्थमन्त्रीमा विष्णु पौडेल र वर्षमान पुन मध्ये एकजना अर्थमन्त्री हुने चर्चा थियो । तर, मंगलबार पौडेलको नाम चर्चामा नदेखिएपछि सेयर बजार पनि एकाएक ओरालो लागेको थियो । नयाँ अर्थमन्त्री वर्षमान पुन नै बन्ने चर्चा चलेका कारण सयर बजारमा यस्तो नकारात्मक असर परेको सम्बन्धीत लगानीकर्ता एवं सरोकारवालाहरुले बताएका छन ।
उनीहरुका अनुसार यसले लगानीकर्ताको मनोवल घटेको बुझ्न सकिन्छ । मंगलबार दिनभरमा ३१६ कम्पनीको १ करोड १४ लाख ६७ हजार ५९९ कित्ता सेयर ६९ हजार २०८ पटक खरिदबिक्री हुँदा ४ अर्ब ११ करोड ३६ लाख ७६ हजार रुपैयाँ बराबरको कारोबार भएको नेप्सेले जनाएको छ ।
मंगलबार कुल २१३ वटा कम्पनीको सेयर मूल्य घटेको थियो भने ३३ कम्पनीको सेयर मूल्य बढेको थियो । मंगलबार म्युचुअल फण्ड समूह ०.६६ प्रतिशत बढेको थियो भने अन्य सबै समूहमा राताम्य छाएको थियो । यसदिन बैंकिङ समूह ३.०१ प्रतिशत, विकास बैंक समूह ३.६५ प्रतिशत, फाइनान्स समूह २.७५ प्रतिशत, होटल तथा पर्यटन समूह ३.६९ प्रतिशत, जलविद्युत समूह ४.३० प्रतिशत, लगानी समूह ३.४८ प्रतिशत, जीवन बीमा समूह ३.४९ प्रतिशत, उत्पादन समूह ४.२० प्रतिशत, लघुवित्त समूह १.२७ प्रतिशत, निर्जीजन बीमा समूह २.६० प्रतिशत, अन्य समूह ४.३५ प्रतिशत र व्यापार समूह २.१५ प्रतिशतले गिरावट आएको थियो ।
बोटलर्स नेपाल (बालाजु)को सेयर मूल्य सबैभन्दा धेरै १० प्रतिशत घटेको थियो । यस कम्पनीको सेयर मूल्य २ हजार ३२८.६० रुपैयाँ घटेर २० हजार ९६२ रुपैयाँमा झरेको थियो । जोशी हाइड्रोपावर ९.९९ प्रतिशत अर्थात ३८.४० रुपैयाँ घटेर ३४६ रुपैयाँमा सीमित भएको थियो । यस्तै, बोटलर्स नेपाल (तराई)को ९.४५ प्रतिशत अर्थात् १ हजार ५४४.४० रुपैयाँ घटेर १४ हजार ८ सय रुपैयाँमा सेयर मूल्य झरेको थियो ।
बजारमा भारि अंकको गिरावट भएपनि गुराँस लघुवित्तको सेयर मूल्य सबैभन्दा धेरै ८.७३ प्रतिशत अर्थात् ७९.९० रुपैयाँ बढेर ९९५ रुपैयाँ पुगेको थियो । साथै, मंगलबार सोनापुर मिनिरल्सको सेयर कारोबार सर्वाधिक भएको थियो । यस कम्पनीको ४१ करोड ९१ लाख २२ हजार रुपैयाँ बराबरको सेयर कारोबार भएको थियो । यस्तै, शिवम् सिमेन्टको २४ करोड ६५ लाख रुपैयाँ, घोराही सिमेन्टको १४ करोड ३१ लाख रुपैयाँ बराबरको कारोबार भएको थियो ।