३१ बैशाख / अर्थ र व्यापार- नयाँ स्टक ब्रोकर एसोसिएसनले स्टक ब्रोकर्स एसोसिएसन अफ नेपालले नयाँ ब्रोकर लाइन्सेन्स वितरण प्रक्रियामा नियामक निकाय, सरकार र सर्वोच्च अदालतमाथि लगाएको आर्थिक चलखेलप्रति गम्भीर ध्यानाकर्षण भएको जनाएको छ ।

धितोपत्र बोर्डबाट पूर्वस्वीकृति प्राप्त गरेका नयाँ धितोपत्र दलाल तथा व्यापारी कम्पनीहरुको भेलाले सागर ढकालको संयोजकत्वमा ११ सदस्यीय नयाँ स्टक ब्रोकर एसोसिएसन नेपाल गठन समेत गरेको छ ।

नयाँ स्टक ब्रोकर एशोशियसनका संयोजक सागर ढकालले विज्ञप्ति जारी गर्दै पुरानो स्टक ब्रोकर्स एसोसिएसनले गत वैशाख २९ गते विज्ञप्ति जारी गर्दै नेपाल धितोपत्र बोर्ड, मन्त्रिपरिषद र सर्वोच्च अदालतमाथि लगाएको आर्थिक चलेखलप्रति गम्भीर ध्यनाकर्षण भएको जनाएका छन् ।

आफ्नो सिन्डिकेट र मोनोपेली कायम राख्नका लागि पुरानो स्टक ब्रोकर्स एसोसिएसनले सर्वोच्च अदालत र सरकारको स्वायत्त संस्था नेपाल धितोपत्र बोर्डमाथि आर्थिक चलखेलको आरोप लगाउनु कपोकल्पित र भ्रामक रहेको नयाँ स्कट ब्रोकर एसोसिएनले जनाएको छ ।

नयाँ स्टक ब्रोकर एसोसिएसनद्वारा जारी विज्ञप्तिमा स्टक ब्रोकर्स एसोसिएसन अफ नेपालले विज्ञप्ति जारी गर्दै स्वायत्त नियामक निकाय नेपाल धितोपत्र बोर्ड, तत्कालीन मन्त्रिपरिषद तथा सर्वोच्च अदालतमाथि प्रत्यक्ष तथा अप्रत्यक्ष रुपमा आर्थिक चलखेल गरेको आरोप लगाइएको र यसमा भर्खरै पूर्वस्वीकृति लिई सञ्चालनको तयारीमा रहेका ४३ वटा नयाँ ब्रोकर कम्पनीहरुसमेत संलग्न रहेको आरोप पूर्ण रुपमा निराधार र कपोलकल्पित रहेको जनाइएको छ । आधारहीन विज्ञप्तिले ५६ लाख लगानीकर्ताले गरेको अपेक्षामाथिको तुषारापात भएको एशोशियसनले जनाएको छ ।

नयाँ स्टक ब्रोकर एशोशियसनले एघार बुँदा सहित विज्ञप्ति जारी गरेको छ । विज्ञप्तिमा सर्वोच्च अदालतवाट कानुनी परिक्षण भई निर्णय भईसकेको विषयलाई समेत उठान गरि सर्वौच्च अदालतको मानहानी गर्ने कोशिस गरिएको जनाएको छ ।

नेपालको इतिहासमा पहिलोपटक समय सीमा तोकेर, तोकेको समय सीमाभित्र सम्पूर्ण कार्यहरु सक्दै पूर्ण रुपमा पारदर्शी ढंगबाट सबै प्रक्रियाहरु सम्पन्न गरी कार्य अगाडि बढाएको देखेको र सो उपर १ पैसा समेत खर्च नगर्नुपरेको सम्भवतः यो नै पहिलो घटना रहेको विज्ञप्तिमा जनाइएको छ ।