१५ कात्तिक/अर्थ र व्यापार – लामो समयदेखि निकै चर्चामा रहेको स्वदेशी पुँजि बजारमा स्कट एक्सचेन्ज र कमोडिटी एक्सचेन्जको नयाँ लाइसेन्स वितरण गर्ने कार्य तत्कालकालागि रोकिएको छ । तोकिएको समयभित्र कुनै पनि आवेदन नै नपरी म्याद गुज्रिएका कारण नेपाल धितोपत्र बोर्डले लाइसेन्स वितरण गर्न लागेको स्टक एक्सचेन्जको नयाँ इजाजतको च्याप्टर अहिलेका लागि स्थगित भएको हो ।
यसअघि स्टक एक्सचेन्जको नयाँ लाइसेन्स विवादको सम्बन्धमा सर्वोच्च अदालतमा परेको रिटमाथि तिहार अघि नै अन्तरिम अल्पकालीन आदेश जारी गरेका कारण बोर्डले नयाँ आवेदन नलिने निर्णय गरेको छ । सोमबारसम्म कुनै पनि आवेदन नपरेको अवस्थामा सोमबार नै सर्वोच्च अदालतबाट अन्तरिम आदेश प्राप्त भइसकेकोले मंगलबारदेखि आवेन नै लिन नसक्ने अवस्थामा नेपाल धितोपत्र बोर्ड पुगेको हो ।
यसअघि बोर्डले ४५ दिने सूचनामार्फत नयाँ स्टक एक्सचेन्ज र कमोडिटी एक्सचेन्जको लाइसेन्सको लागि आवेदन माग गरेको थियो । सो म्याद मंगलबार सकिएको छ । सर्वोच्च अदालतको अन्तरिम आदेश जारी गरिसकेको र कुनै पनि आवेदन नपरेकोले नयाँ स्टक एक्चसेन्ज र कमोडिटी एक्सचेन्जको लाइसेन्स वितरण प्रक्रिया हालका लागि रोकिएको बोर्डले जनाएको छ ।
नेपाल धितोपत्र बोर्डका प्रबक्ता रुपेश केसीले सर्वोच्च अदालतको अन्तरिम आदेश आइसकेकोले मंगलबारबाट नयाँ आवेदन दर्ता लगायतका कुनै पनि काम हुने जानकारी दिए । अहिलेसम्म कुनै पनि आवेदन दर्ता नभएको बोर्डले जनाएको छ । बोर्डका प्रबक्ता केसीले भने, ‘आजसम्म कुनै पनि निवेदन दर्ता भएको छैन ।’ उनले अब यस विषयमा बोर्डले नै निर्णय गर्ने र जारी प्रक्रिया हाललाई स्थगित भएको बताए ।
सोमबार सर्बोच्च अदातलको आदेश बोर्डमा आईपुगेको जानकारि गराउँदै केसीले भने, ‘आदेश आएसँगै हामीले आवेदन लिने कार्य अहिलेलाई स्थगित गरिएको हो । आगामी २२ कात्तिकमा यो विषयमा छलफलका लागि बोलाइएको छ ।’ त्यसपछि आवेदन लिने वा नलिने टुंगो लाग्ने छ ।’
बोर्डले धितोपत्र बजार सञ्चालन (दोस्रो संशोधन) नियमावली, २०७९ अनुसार नयाँ स्टक एक्सचेन्ज सञ्चालन गर्न इच्छुक कम्पनीका लागि आवेदन खुला गरेको थियो । बोर्डले स्टक एक्सचेन्ज र वस्तु विनियम बजार व्यवसायका लागि ४५ दिनको समय दिएर सूचना प्रकाशित गरेको थियो । सोही सूचना अनुसार थुप्रै कम्पनीहरुले अन्तिम दिन मंगलबार निवेदन दर्ता गर्ने योजना बनाएका थिए । सर्बोच्चको आदेशले उनीहरुको योजना समेत त्यसै तुहिएको छ ।