२८ पुस/अर्थ र व्यापार– सरकारी स्वामित्वमा रहेको कोटेश्वरस्थित जडीबुटी उत्पादन तथा प्रशोधन कम्पनी लिमिटेडले पनि आईपीओ निष्कासन गर्ने भएको छ । विगत तीन वर्षदेखि नाफामा गएपछि सर्वसाधारणका लागि प्राथमिक सेयर (आईपीओे) निष्कासनको तयारीमा सो कम्पनी जुटेको हो । 
३ वर्षसम्म मुनाफामा गएपछि आईपीओे निष्कासन गर्नुपर्ने प्रावधानअनुसार कम्पनीले चालु आर्थिक वर्षभित्र नै आईपीओ निष्कासन गर्न लागेको हो । कुनै समय घाटामा रहेको कम्पनी कर्मचारीलाई उपदान दिन बजेट नभएपछि जग्गा बेच्न बाध्य भएको थियो । कम्पनीको मुनाफाले आईपीओ निष्कासनका लागि बाटो खुलेको छ । 
सो कम्पनीका अध्यक्ष समेत रहेका वन तथा वातावरण मन्त्रालयका सहसचिव डा. सिन्धुप्रसाद ढुंगानाले कम्पनी मुनाफातिर जान थालेपछि आईपीओ निष्कासन गर्ने तयारी भइरहेको जानकारी दिए । उनले १ अर्ब २० करोड पुँजीको ४९ प्रतिशतसम्म सर्वसाधारणका लागि सेयर निष्कासन गरिने बताए । उनले अहिले संचालक समितिमा छलफल भएको जानकारि गराउँदै उनले साधारणसभाले निर्णय स्वीकृत गरेपछि अर्थको सहमति आउनुपर्छ अनि सेयर निष्कासनका लागि बाटो खुल्ने बताए । 
कम्पनीका अनुसार आव २०७५/०७६ मा पहिलो पटक कम्पनीले एक करोड ९२ लाख नाफा कमाएको थियो । आव २०७६/०७७ मा कम्पनीले एक करोड २२ लाख नाफा कमाएको थियो भने आव २०७७/०७८ को अहिले लेखापरीक्षण भइरहेको छ । यो आवमा पनि कम्पनी नाफामा रहेको वन तथा वातावरण मन्त्रालयको भनाइ छ ।
अर्थ मन्त्रालयले प्रकाशन गरेको संस्थान सम्बन्धी प्रगति प्रतिवेदन अनुसार सरकारका औद्योगिक क्षेत्रमा रहेका सार्वजनिक संस्थानमध्ये जडीबुटी कम्पनी नाफामा रहेका संस्थानमध्ये एक हो । कम्पनीले आव २०७६/०७७ देखि सेयरधनीलाई लाभांश बाँड्न थालेको छ ।
जडीबुटी बेचेर नाफा कमाउने उद्देश्यले २०३८ साल पुसमा कम्पनी स्थापना गरिएको थियो । स्थापनाको सुरुका वर्षमा नाफा कमाएको कम्पनी पछिल्लो समय भने घाटामा थियो । कम्पनीका महाप्रबन्धक ज्ञानेश्वर कार्कीका अनुसार उत्पादनमा वृद्धि र स्रोतसाधनको उचित प्रयोग गरेपछि कम्पनीले मुनाफा कमाउन थालेको हो । 
हाल सरकारी निकायमात्र कम्पनीको सेयर सदस्य छन् । वन तथा वातावरण मन्त्रालय, कृषि विकास बैंक, नेपाल औषधि लिमिटेड र वन पैदावर विकास समिति कम्पनीको सेयर सदस्यका रूपमा रहेका छन् ।  यो कम्पनी सरकारी सस्वामित्वमा सञ्चालित कम्पनी हो ।