४ असोज / अर्थ र व्यापार – सोमबार सेयर बजारमा ११४ अंकको पहिरो गएको छ । ४ प्रतिशतको गिरावटसँगै नेप्से परिसूचक २७ सयमुनि झरेको छ।  सोमबारको कारोबारपछि नेप्से परिसूचक २६९८ अंकमा कायम भएको नेपाल स्टक एक्सचेन्जले जनाएको छ।  
स्टक एक्सचेन्जका अनुसार यस दिन ८ अर्ब ४९ करोड रुपैयाँको सेयर किनबेच भएको छ। सबै समूहहरु राताम्मे भएका छन्। बैंकिङ ५१, विकास बैंक ३३२, फाइनान्स २२९, होटल तथा पर्यटन १५८, जलविद्युत २२०, लगानी ५, जीवन बीमा ८००, निर्जीवन बीमा ६१४, माइक्रोफाइनान्स १६२, उत्पादन ९१, अन्य ७० र ब्यापार समूह १५६ अंकले घटेका छन्। 
यसैगरि, चार कम्पनीको मात्रै सेयर मूल्य बढेको छ । मनकामना स्मार्ट लघुवित्तको मूल्य ९.९ प्रतिशतले बढेको छ। हालै सूचीकृत यस कम्पनीको मूल्य प्रतिकित्ता ९८९ रुपैयाँ कायम भएको छ। डिप्रोक्स लघुवित्तको मूल्य २ प्रतिशतले बढेको छ। लक्ष्मी र नयाँ सारथी लघुवित्तको मूल्य पनि सामान्य बढेको छ। 
यस दिन गुडविल फाइनान्स, पोखरा फाइनान्स, आइसिएफसी फाइनान्स, हिमालय उर्जा विकास कम्पनी, घलेम्दी हाइड्रोपावर, प्रोग्रेसिभ फाइनान्स, युनाइटेड इदी मर्दीको मूल्य १० प्रतिशतले घटेको छ। 
सिंगटी हाइड्रोपावर, एक्सल डेभलपमेन्ट बैंक, हिमालय पावर पार्टनर, सेन्ट्रल फाइनान्स, श्री इन्भेष्टमेन्ट फाइनान्स र जोशी हाइड्रोपावरको मूल्य ९.९ प्रतिशतले घटेको छ।  गत २ भदौमा नयाँ कीर्तिमानी ३१९८ अंक कायम गर्यो। त्यसयता बजार घटिरहेको छ। यो पटकको ‘बुलिस ट्रेन्ड’मा भदौ २ को अंक नै उच्चतम विन्दु रहेको अनुमान छ। बजार घट्नुको मुख्य कारण लगानीयोग्य रकमको अभाव र बढ्दो ब्याजदर हो।
असोज १ देखि लागू हुनेगरी बैंकहरुले ब्याजदर बढाइसकेका छन्। वाणिज्य बैंकले नै मुद्दतीमा १० प्रतिशत ब्याज दिन थालेका छन्। ब्याजदर अझै बढ्ने अनुमान छ । अर्कोतर्फ सेयर बजार घट्दै जाँदा ‘मार्जिन कल’को त्रास समेत लगानीकर्तामा बढ्न थालेको छ। यसले पनि बजार घटाउनमा अझ टेवा पुर्याएको छ । अर्कोतर्फ राष्ट्र बैंकको नीतिले पनि बजारलाई केही हदसम्म प्रभाव पारेको लगानीकर्ताको गुनासो छ।  राष्ट्र बैंकले एक व्यक्ति वा परिवारले सेयर खरिदका लागि सेयर नै धितो राखेर बैंक तथा वित्तीय संस्थाहरुबाट १२ करोडभन्दा बढी ऋण नपाउने व्यवस्था गरेको छ। त्यही व्यवस्थाले पनि बजारलाई असर पारेको सेयर लगानीकर्ताहरुको भनाई छ । 
यदि एक व्यक्ति वा परिवारले बैंक तथा वित्तीय संस्थाबाट सेयरमै लगानीका लागि सेयर धितो राखेर १२ करोड भन्दा बढी ऋण लिएको अवस्थामा एक वर्षभित्र सीमामा ल्याइसक्नुपर्नेछ । यहीं व्यवस्थाका कारण अहिले ठूला लगानीकर्ता सक्रिय हुन सकेका छैनन् ।