२४ चैत्र /अर्थ र व्यापार - युनिभर्सल पावर कम्पनीको बजार मूल्य आधार मूल्यभन्दा तल झरेको छ । दोस्रो बजारमा पहिलो कारोबार २७० रुपैयाँमा भएको थियो । घट्दो क्रममा सर्किट लाग्ने क्रममा ११औं कारोबार दिनमा ९८ रुपैयाँमा झरेको छ । 
नेपाल स्टक एक्सचेन्जले कम्पनीको पहिलो कारोबारका लागि १०१.११ रुपैयाँदेखि ३०३.३३ रुपैयाँको रेन्ज तोकेको थियो । रेन्ज तोकेसँगै चैत्र १३ गते नेप्सेमा पहिलो कारोबार २७० रुपैयाँमा भयो । पहिलो कारोबार २७० रुपैयाँबाट झर्ने क्रममा आज ९८ रुपैयाँमा झरेको हो । 

पछिल्लो समय हाइड्रोपावरको कम्पनीलाई लगानीकर्ताको विश्वास गर्न नसक्दा बजार मूल्य धेरै नै घटिरहेको छ । केही वाठा लगानीकर्ताले सुरुको कारोबार अधिकतम रेन्जमा गरिदिने परिपाटीले गर्दा यस्ता कम्पनीमा लगातार सर्किट लाग्ने अवस्था आएको बजार विश्लेषक सुरज अधिकारी बताउँछन् ।  पहिलो कारोबार अधिकतम मूल्यबाट सुरु भएपछि स्वभाविक रुपमा नै घट्दो क्रममा सर्किट लाग्ने उनले बताए । नेप्सेले तोकिदिएको तल्लो रेन्जबाट कारोबार सुरु भएको भए कम्पनीको भ्यालु अनुसार बढ्ने अवस्था हुने विश्लेषकहरु बताउँछन् । कम्पनीको वित्तीय अवस्था र लगानीकर्ताको मानसिकता कमजोर हुँदा यस्ता कम्पनीको मूल्य अस्वभाविक रुपमा तल झर्ने उनीहरुको तर्क छ ।

पछिल्लो समय शेयर निष्काशन गरेका हाइड्रोपावरको आइपिओ अधिकतम रेन्जबाट कारोबार सुरु हुने र विस्तारै घट्दै जाने गरेको छ । अपर तामाकोशी, शिवम् सिमेन्टको कारोबारमा पनि यस्तै देखियो ।अपर तामाकोशीको हकमा अधिकतम रेन्जभन्दा १०७ रुपैयाँले बजार बढ्यो । पछि घट्ने क्रममा अधिकतम रेन्ज २२४ रुपैयाँ भन्दा तल झर्यो । शिवम् सिमेन्टको शेयर पनि अधिकतम रेन्ज ४८४.८० रुपैयाँ तोकियो । पहिलो कारोबार ४६४ रुपैयाँमा भयो। तर कारोबार सुरु भएको दिन देखिनै घट्न थालेको थियो । 

नेप्सेले न्युनतम र अधिकतम कारोबारको रेन्जको ग्याप धेरै तोक्दा बजारमा चलखेल गर्ने स्पेस बनेको बजार विश्लेषकहरु बताउछन् । कम्पनीले दोलखा जिल्लामा ११ मेगावाट क्षमताको तल्लो खहरेखोला जलविद्युत आयोजना निर्माण गरिरहेको छ । कम्पनीको प्रतिमेगावाट लागत १८ करोड ६० लाख रुपैयाँ रहेको छ भने लगानी फिर्ता हुने न्युनतम अवधि ८ वर्ष लाग्नेछ ।
कम्पनीको चुक्ता पूँजी दुई अर्ब १० करोड रुपैयाँ रहेको छ । आयोजनाको जम्मा लागत दुई अर्ब ४ करोड रुपैयाँ रहेको छ । आयोजनाको लागत भन्दा शेयर पूँजी धेरै उठाएको देखिन्छ । आयोजना यसै वर्ष सम्पन्न हुने कम्पनीले जनाएको छ ।  आयोजनाको लागत भन्दा पूँजी धेरै उठाएकोको कम्पनीलाई लगानीर्ताहरुले विश्वास नगर्दा बजार बजार मूल्य लगातार घटेको हो ।