३० पुस/ अर्थ र व्यापार - निर्माणाधिन ३१ जलविद्युत आयोजनाको काम ५० देखि ९५ प्रतिशतसम्म सकिएको छ । यी आयोजनाबाट एक हजार २५८ मेगावाट विद्युत उत्पादन हुन्छ । यी आयोजनाबाट उत्पादित बिजुली आगामी डेढ वर्षभित्र राष्ट्रिय प्रशारण लाइनमा जोडिने विद्युत विकास विभागले जनाएको छ । चालु आर्थिक वर्ष्भित्र मात्रै नेपाल विद्युत प्राधिकरणले निर्माण गरिरहेको १४ मेगावाटको कुलेखानी र निजी क्षेत्रका आयोजना सहित १०५ मेगावाट विद्युत राष्ट्रिय प्रशाण लाइनमा जोडिने छ ।
बिन्ध्यवासिनी हाइड्रोपावरले निर्माण गरिरहेको ८.८ मेगावाटको रुडी ए जलविद्युत आयोजना निर्माणको काम सकिएको छ । परिक्षण उत्पादन गरिरहेको आयोजनाले यहि माघभित्र नियमित विद्युत उत्पादन सुरु गर्ने जनाएको छ ।

विद्युत प्राधिकरणले निर्माण गरिरहेको १४ मेगावाटको कुलेखानी तेस्रो, २५ मेगावाटको काबेली बी १, २१.६ मेगावाटको तल्लो हेवा खोला, २२.२ मेगावाटको अपर चाकु ए, ३.२ मेगावाटको गेलुन खोला र ९.९ मेगावाटको इवा खोला जलविद्युत आयोजनाको काम अन्तिम चरणमा पुगेको छ । यी आयोजनाको भौतिक प्रगति ९० प्रतिशतभन्दा बढि भएकाले चालु आर्थिक वर्षभित्र १०५ मेगावाट विद्युत राष्ट्रिय प्रशारण लाइनमा जोडिने विभागको भनाई छ । अर्को वर्षभित्र उत्पादनमा आउने आयोजनामा ४५६ मेगावाटको माथिल्लो तामाकोशी, ६० मेगावाटको अपर त्रिशुली ३ ए, २० मेगावाटको तल्लो मोदी खोला, २५ मेगावाटको अपर दोर्दी ए, ६.४२ मेगावाटको अपर मैलुङ ए, ३.३ मेगावाटको कपाडीगाड, ५ मेगावाटको घट्टेखोला र ५ मेगावाटकै इखुवा खोला जलविद्युत आयोजना रहेका छन् । ७५ प्रतिशत बढी निर्माण कार्य सकिएका यी आयोजनाबाट अर्को वर्ष ५८० मेगावाट विद्युत उत्पादन भइ राष्ट्रिय प्रशारण लाइनमा जोडिने विभागले जनाएको छ ।

४० मेगावाटको खानीखोला १, २५ मेगावाटको सिंगटीखोला, १११ मेगावाटको रसुवागढी र २७ मेगावाटको दोर्दीखोलाको निर्माण ६५ प्रतिशतभन्दा बढि सकिएको छ । यी चार आयोजनाको क्षमता २०३ मेगावाट रहेको छ । ८२ मेगावाटको तल्लो सोलु, २३.५ मेगावाटको सोलु, १५.१ मेगावाटको मध्य मोदी र २.१५ मेगावाटको पराजुली खोला जलविद्युत आयोजनाको निर्माण पनि ६० प्रतिशत बढि सम्पन्न भएको छ । यी चार आयोजनाको क्षमता १२३ मेगावाट रहेको छ ।

१०२ मेगावाटको मध्य भोटेकोशी, ४२.५ मेगावाटको साञ्जेन, ४२ मेगावाटको मिस्त्री खोला, २२ मेगावाटको बागमती नाडी, १२ मेगावाटको अपर खिम्ती, १२ मेगावाटकै नामार्जुन मादी, ७ मेगावाटको खिम्ती २ र ७ मेगावटकै अपर मादी जलविद्युत आयोजनाको काम ५० प्रतिशत भन्दा बढी सम्पन्न भएको छ । आयोजना निर्माणमा कुनैपनि किसिमको बाधा अवरोध नआए अहिले ५० प्रतिशत निर्माण सम्पन्न भएका आयोजनाहरु आगामी डेढ र दुई वर्ष भित्रमा निर्माण सम्पन्न हुने र एक हजार २५८ मेगावाट विद्युत राष्ट्रिय प्रशारण लाइनमा जोडिने विभागको विश्वास छ ।