१३ बैशाख /अर्थ र व्यापार - नेपाल लाइफ इन्स्योरेन्स कम्पनीद्वारा जेठ ४ गते १९ औं वार्षिक साधारणसभा डाकिएको छ । नेपाल लाइफ गत आर्थिक वर्षको साधारणसभा गर्ने पहिलो बीमा कम्पनी भएको छ । दोस्रो बजारमा सूचीकृत जीवन तथा निर्जीवन बीमा कम्पनीहरुमध्ये नेपाल लाइफ पहिलो हो ।
वैशाख १२ गते बसेको सञ्चालक समितिको बैठकले साधारणसभाको मिति तय गरेको हो । कम्पनीको सञ्चालक समितिले यस अगाडि नै चुक्ता पूँजीको २३.५ प्रतिशत नगद लाभांश र २५ प्रतिशत बोनस शेयर दिने घोषणा गरेको थियो । समितिको उक्त घोषणा आगामी हुने साधारणसभामा विशेष प्रस्तावको रुपमा अगाडि सारिएको छ ।

कम्पनीले चुक्ता पूँजीको २५ प्रतिशत बोनस शेयर पारित गरे सँगै चुक्ता पूँजी ५ अर्ब ४९ करोड रुपैयाँ पुग्नेछ । साधारणसभामा कम्पनीको अधिकृत पूँजी १० अर्ब रुपैयाँ पुर्याउने विशेष प्रस्ताव अगाडि सारिएको छ । हाल कम्पनीको चुक्ता पूँजी ४ अर्ब ३९ करोड रुपैयाँ रहेको छ । कम्पनीले साधारणसभा प्रयोजनको लागि जेठ चार गतेसम्म बुक क्लोज गर्ने भएको छ। वैशाख १७ गतेसम्म कायम शेयरधनीहरुले ४८.५ प्रतिशत लाभांश पाउने छन् । वैशाख १८ गते विश्व मजदुर दिवस भएकोले नेपाल स्टक एक्सचेन्जमा कारोबार हुँदैन ।

आर्थिक वर्ष २०७५र७६ का लागि साविककै लेखा परीक्षक ज्ञानेन्द्र एण्ड एशोशिएट्सलाई नै पुनः नियुक्त गर्ने भएको छ । साधारणसभामा सञ्चालक समितिका अध्यक्षले गत आर्थिक वर्षको लेखापरीक्षण प्रतिवेदन प्रस्तुत गर्ने छन् । गत आर्थिक वर्षदेखि एनएफआरएस प्रणाली अनुसार वित्तीय विवरण तयार पार्नु पर्ने भएकोले कम्पनीको साभारणसभा ढिला भएको हो । जीवन बीमा कम्पनीहरुले लेखापरीक्षण तयार पारेसँगै एक्चुरियल भ्यालुएसन गर्नुपर्ने हुँदा साभारणसभा ढिला हुँदै आएको छ । बाँकी जीवन बीमा कम्पनीले पनि गत आर्थिक वर्षको साधारणसभा गर्न सकेका छैनन् । जीवन बीमा कम्पनीहरुमध्ये नेपाल लाइफ इन्स्योरेस कम्पनीको मात्रै ३६ प्रतिशत भन्दा धेरै हिस्सा रहेको छ ।

पूँजी तथा बीमा शुल्क आर्जका हिसावले सबैभन्दा अगाडि रहेको नेपाल लाइफ इन्स्योरेन्स कम्पनीले हरेक वर्ष शेयरधनीहरुलाई बम्पर बोनस प्रदान गर्दै आएको छ । राम्रो बोनस प्रदान गरिरहेको कम्पनीको बजार मूल्य पनि अन्य कम्पनीको भन्दा राम्रो रहेको छ । जीवन बीमा कम्पनीहरुमध्ये नेपाल लाइफ इन्स्योरेन्स कम्पनीको बोनस दर सबैभन्दा उच्च रहेको छ। बीमा समितिका अनुसार कम्पनीको बोनस दर न्यूनतम प्रतिहजार ६५ देखि ८२ रुपैयाँसम्म रहेको छ ।