४ बैशाख /अर्थ र व्यापार - माउन्टेन हाइड्रोपावरको पहिलो कारोबार नै १०० रुपैयाँमा भएको छ । नेपाल स्टक एक्सचेन्जले कम्पनीको पहिलो कारोबारका लागि ९३.७५ रुपैयाँदेखि २८१.२५ रुपैयाँसम्ममा गर्न पाउने गरी रेन्ज तोकोको थियो । नेपाल स्टक एक्सचेन्जको नयाँ प्रणाली ‘प्रि ओपन सेसनमा’ दुई दिनसम्म कारोबार नै हुन सकेन । बुधबारको प्रि ओपन सेसनमा पहिलो कारोबार १०० रुपैयाँमा म्याचिङ भएको छ ।

यस अघि दोस्रो बजारमा सूचीकृत युनिभर्सल पावर कम्पनीको पहिलो कारोबार अधिकतम रेन्जको हाराहारीमा भयो । तर कम्पनीको बजार मूल्य दिन दिनै घट्दो क्रममा सर्किट लाग्दै आएको थियो । कम्पनीको पहिलो कारोबारका लागि १०१ रुपैयाँदेखि ३०३ रुपैयाँसम्मको रेन्ज तोकिएको थियो। कम्पनीको पहिलो कारोबार ३०० रुपैयाँमा म्याचिङ भएर लगातार घट्ने क्रममा ९० रुपैयाँसम्म झर्यो ।

त्यस्तै जोशी हाइड्रोपावरको शेयरमा पनि यस्तै अवस्था सिर्जना भएको थियो । कम्पनीको पहिलो कारोबारका लागि ९३ रुपैयाँदेखि २८१ रुपैयाँसम्म तोकिएको थियो। पहिलो कारोबार २७९ रुपैयाँमा भएर लगातार घट्ने क्रममा १४७ रुपैयाँसम्म झरिसकेको छ ।
दोस्रो बजार पछिल्लो तीन वर्षदेखि घट्दो ट्रण्डमा छ। घट्दो ट्रण्डमा रहेको बजारमा  अधिकांश सूचीकृत हाइड्रोपावर कम्पनीको बजार मूल्य एक सय रुपैयाँको हाराहारीमा छ । यसले गर्दा नयाँ आउने कम्पनीको पहिलो कारोबार अधिकतम रेन्जमा भएपनि अन्य कम्पनीकै मूल्य हाराहारीमा आउने क्रममा मूल्य लगातार घट्दो क्रममा रहेको देखिन्छ ।

दोस्रो बजारमा हाल २६ वटा जलविद्युत कम्पनी सूचीकृत छ जसमध्ये ९ वटा कम्पनीको बजार मूल्य आधार मूल्य भन्दा तल छ । १३ वटा कम्पनीको बजार मूल्य एक सय रुपैयाँदेखि २०० रुपैयाँको बीचमा रहेको छ । बाँकी चारवटाको २०० रुपैयाँ भन्दा माथि छ ।
प्रति कित्ता १०० रुपैयाँमा प्राथमिक शेयर निष्काशन गरेका अधिकांश जलविद्युत कम्पनको बजार मूल्य नै १०० रुपैयाँ भन्दा तलमा कारोबार भैरहेको छ । यसले गर्दा नयाँ हाइड्रोपावर कम्पनीको प्राथमिक शेयर बिक्री हुन नै धौ धौ हुने गरेको छ । प्राथमिक शेयर निष्कासन गर्ने अधिकांश जलविद्युत कम्पनीको वित्तीय अवस्था निराशाजनक छ । कतिपय कम्पनीको आयोजनाको निर्माण कार्य सकिन अझै केही वर्ष लाग्ने देखिन्छ । यसले गर्दा उनीहरुले अझै केहि वर्ष लाभांश दिन सक्दैनन् । विद्युत उत्पादन सुरु गरेका आयोजनाको पनि अर्बौ रुपैयाँ दीर्घकालीन ऋण तिर्न बाँकी छ । दीर्घकालीन ऋण तिरेर लाभांशका लागि अझै केहि वर्ष पर्खनु पर्ने भएकोले दोस्रो बजारमा कम्पनीले उचित मूल्य पाउन सकेका छैनन् ।