३ बैशाख/अर्थ र व्यापार – नवलपरासिको गैडाकोटस्थित आइएमई समूहको दोस्रो केवलकार सञ्चालनमा आएको छ। एक अर्ब रुपैयाँ भन्दा बढी लगानीमा निर्माण गरिएको यस केवलकार नयाँ वर्ष २०८० को पारेर शुक्रबारदेखि व्यवसायिक रुपमा संचालनमा ल्याइएको हो ।
आइएमई समूहको पहिलो केवलकार परियोजना काठमाडौको चन्द्रागिरि हो । चन्द्रागिरिपछि आइएमई समूहले आफ्नो दास्रो परियोजनाका रुपमा यो केवलकार सञ्चालनमा ल्याएको हो । आइएमई समूहले यो केवलकार १३ महिनामा तयार पारेर संचालनमा ल्याएको बताएको छ ।
केवलकार व्यवस्थापन विभाग प्रमुख अभिषेक विक्रम शाहले निर्माण सुरु भएको १३ महिनामा केवलकार संचालनमा ल्याउन सफल भएको जिकिर गर्दै दृढ ईच्छाशक्ति भए असम्भवलाई सम्भव बनाउन सकिने बताए।
‘केवलकार जस्तो परयोजना १३ महिनामा निर्माण सकेर सञ्चालनमा आएको सो समुहले जनाएको छ । यसले पूर्वाधार निर्माणको माइलस्टोन नै बनाएको मान्नुपर्छ । यो केबलकारका लागि टावर बनाउन सामुदायिक वन र मौलाकालिका धार्मिक वनसमेत कुल २.८२ हेक्टर जग्गा प्रयोग गर्नुपर्ने थियो। यो समूहले वनको जग्गा प्रयोगलाई पनि फाष्ट ट्रयाकमा अघि बढाउन सफल भयो।
दुई किलोमिटर लामो केवलकारमा १२ वटा गोन्डोला छन्। धार्मिक पर्यटकीयस्थल मौलाकालिका मन्दिर क्षेत्रलाई लक्षित गरेर यो केवलकार स्थापना गरिएको हो।
सो केवलकार आयोजनामा ५१ प्रतिशत लगानी आइएमइ समूह र बाँकी ४९ प्रतिशत लगानी स्थानीयवासीको रहेको छ । पूर्वी नवलपरासीको पहाडी क्षेत्र, बिचमा नारायणी नदी र चितवनको पर्यटकीय क्षेत्रको सम्भावनालाई हेरेर केवलकार निर्माण गरिएको हो।
गैँडाकोट मौलाकालिका मन्दिर फेदी धारापानी टोलमा १२ कठ्ठा जमीन खरीद गरेर बटम स्टेशन राखिएको छ । केवलकार मार्फत मौलाकाली मन्दिरसम्म ५ मिनेटमै पुग्न सकिने छ। हाल केबलकारले दुईतर्फी मूल्य ५५० कायम गरिएको शाहले जानकारी दिए ।
उनका अनुसार केबलकारले ३ देखि ४ फिटसम्मका बालबालिकाका लागि ३३०, विद्यार्थीहरुको लागि ४१५ जेष्ठ नागरिकहरुको लागि ४१५ रुपैयाँ र फरक क्षमता भएकाहरुको लागि २७५ रुपैयाँ को टिकट दर राखिएको छ । केबलकारले ८० वर्षमाथिका बृद्धबृद्धा र ३ फिटभन्दा कमका बच्चाबच्चीहरुको लागि निशुल्क सेवा दिने जनाएको छ ।
यसैगरि, आइएमई समूहले निर्माण गरिरहेको बुटवलदेखि पाल्पासम्मको तेस्रो केवलकार दुई महिनाभित्र सञ्चालनमा आउने भएको छ । लुम्बिनी केबलकार कम्पनीमा आइएमई समूहसँगै शर्मा एण्ड कम्पनीका रमेश शर्मा, अम्बिकाप्रसाद पौडेल, चन्द्रागिरि हिल्स र हाथवे इन्भेष्टमेन्ट लगायतको लगानी छ ।
केबलकारको बटम स्टेशन बुटवल–३ बमघाटमा रहनेछ भने टप स्टेशन पाल्पाको तिनाउ गाउँपालिका–३ वसन्तपुर डाँडामा रहनेछ । त्यही टप स्टेशनमा पाँचतारे होटल रहनेछ। चन्द्रागिरिमा जस्तै सुविधासम्पन्न होटल पाल्पाको केबलकारमा निर्माण गरिनेछ।
यो केबलकारको टप स्टेशन र होटल रहने जग्गा कम्पनीको आफ्नै हो । बटम स्टेशन र केबलकार रहने स्थान भने सार्वजनिक जग्गा हो । कम्पनीले चन्द्रागिरि जस्तो सबै वन र सरकारी जग्गा नभएकाले यि केबलकार निर्माणमा भने धेरै अवरोध ब्योहोर्नु नपरेको जनाएको छ ।