२१ असोज / अर्थ र व्यापार– सेलवेज डिपार्टमेन्टल स्टोरले पोखराको शान्तिनगरचोकमा २९ औं शाखा बिस्तार गरेको छ । बिहिबारदेखि पोखरा महानगरपालिका–७ शान्तिनगरस्थित बराल पेट्रोल पम्पसँगै रहेको व्यापारिक भवनबाट औपचारिक सेवा शुभारम्भ गरेको सेलवेज डिपार्टमेन्टल स्टोर र सेल्सबेरी डिपार्टमेन्टल स्टोरका गण्डकी प्रदेश प्रमुख दयाल गिरीले जानकारी दिए ।
पोखरामा शान्तिनगरमा नयाँ सेवा विस्तार गरिएको शाखा पोखराका लागि छैटौं तथा समग्रमा २९ औं शाखा हो । प्रमुख व्यवस्थापक दयालको अनुसार यसको लागत करिब ८ करोडको रहेको छ । यस नयाँ शाखामा खाद्य सामग्रीका सम्पूर्ण सामान र लेकसाईडका होटल तथा रेष्टूरेन्टका लागि आवश्यक पर्ने सबै सामग्रीहरु पाइने गिरिले बताए ।
स्टोरको भुईंतलामा खाद्य सामग्री र सौन्दर्यका सामग्री राखिएको छ । पहिलो तलामा इलेक्ट्रोनिक सामग्री र दोश्रो तलामा आधुनिक फर्निचरका सामग्रीहरु राखिएको छ ।
पोखरा शान्तिनगरमा खोलिएको यो शाखाबाट शुभारम्भको अवसरमा १० प्रतिशतसम्म छुटको व्यवस्था गरिएको छ भने फ्रि होम डेलिभरीको व्यवस्था समेत गरिएको गिरीले बताए ।
सेलवेजले सन १९९३ देखि पोखराको चिप्लेढुंगाबाट सामान्य खाद्य पसलबाट सेवा आरम्भ गरेको थियो । तर अहिले देशका विभिन्न ठाउँबाट सेवा दिँदैं आएको छ । निकट भविष्यमै पोखरा र लेखनाथका केही स्थानमा आउटलेट विस्तार गर्ने योजना रहेको कम्पनीले जनाएको छ ।
विशेषतः सेलवेज डिपार्टमेन्टल स्टोर प्रा।लिले पोखरा र काठमाडौंका विभिन्न स्थानका शाखाहरुबाट सेवा दिईरहेको छ । काठमाडौंको सातदोबाटो, सितापाईला, महाराजगञ्ज, चक्रपथ, झम्सिखेल, बत्तिसपुतली, इमाडोल, कोटेश्वर, लोकन्थली, नयाँबस्ति, पेप्सिकोला, मुलपानी, मैजुवहाल, ककनी, सुकेधारा, हात्तिगौंडा, धापासी, पुरानो बानेश्वर, मध्येबानेश्वर, बनेपा, बालुवाटार, भक्तपुर र भैंसेपाटीमा यसको शाखाहरु संचालनमा रहेका छन ।
पोखराको सेलवेज काठमाडौं सन् २००४ मा प्रवेश गरेको हो । २०१४ बाट सेल्सबेरीको नामबाट पनि शाखाहरू संचालनमा आएका थिए । यी दुई कम्पनी सिस्टर कम्पनीका रुपमा संचालनमा रहेको कम्पनीले जनाएको छ ।
कम्पनीले नयाँ वर्ष २०७९ सालबाट काठमाडौंको महाराजगञ्जमा अन्तर्राष्ट्रिय स्तरको सुविधा सम्पन्न मल संचालनमा ल्याउने तयारी गरिरेहेको छ । यता कास्कीको लेखनाथमा नयाँ शाखा बिस्तारको तयारी पनि गरिएको प्रमुख व्यवस्थापक दयाल गिरिले जानकारी दिए ।