३१ भाद्र / अर्थ र व्यापार – निजी क्षेत्रको आन्तरिक वायुसेवा कम्पनी गुण एयरलाइन्सले भोली १ असोजबाट नियमित उडान सुरु गर्ने भएको छ । प्ररम्भमा यस वायुसेवाले काठमाडौंबाट भरतपुर र पोखरामा नियमित हवाई उडान थाल्नेगरी मंगलबारदेखि नै टिकट बुकिङ खुला गरेको जनाएको छ ।
गुण एयरलाइन्सका प्रवक्ता एवं प्रमुख बजार व्यवस्थापक प्रज्वल थापाले भोली १ असोजबाट नियमित व्यवसायीक उडान सुरु हुने बताए । थापाका अनुसार यस वायुसेवाले पहिलो उडान काठमाडौंबाट भरतपुरकालागि भर्ने छ । सो एयरलाइन्सका अनुसार पहिलो दिनको उडान भोली १ असोजमा बिहान साढे १० बजेटबाट सुरु हुने छ । त्यसपछि सोही दिन काठमाडौंबाट पोखरा उडान भर्ने गरी उडान तालिका तय गरिएको उनले जानकारी दिए । 
गुणले हाल दुई वटा गन्तव्यबाट आन्तरिक व्यवसायीक उडान सुरु गर्ने र आगामी दिनमा यात्रुहरुको माग बमोजिम विस्तारै आफ्नो उडान गन्तव्य पनि बढाउँदै जाने रणनीति तय गरेको छ । नियमित व्यवसायीक उडान तयारीसँगै गुण एयरलाइन्सले तीनवटा जेटस्ट्रीम र एउटा बिचक्राफ्ट विमानलाई तयार पारिसकेको छ । आगामी दिनकालागि पनि छिटै थप तीन वटा विमान तयार पार्ने सो एयरलाइन्सले जनाएको छ । थापाले अब यो वायुसेवाले दशैंका यात्रुलाई सहज रुपमा हवाई सेवा उपलब्ध गराउन सबैजसो सुगम क्षेत्रका गन्तव्यमा उडान भर्नेगरी तयारी पूरा भएको जानकारी दिए । 
अहिलेको यो उडान सेवा सञ्चालनकालागि यो वायुसेवाले यात्रुको सेवा र सुविधालाई उत्कष्ट बनाउका लागि एक वर्ष भन्दा लामो समयदेखिको तयारी गरिरहेको जनाएको छ । कोरोना महामारी न्यूनीकरण तथा रोकथाम गर्न सरकारले ११ चैत २०७६ देखि गरेको लकडाउन र निशेधाज्ञाका कारण थन्किएको वायुसेवा क्षेत्रमा यो कम्पनीले नयाँ ब्राण्डमा र बलियो उपस्थिति देखाउने गरी आफु प्रस्तुत भएको बताएको छ ।
गुण इरलाइन्सले ८ वर्ष अघिको आफ्नै ब्राण्डमा आगामी उडान सेवा सुरु गर्न लागेको हो । गुण एयरलाइन्सबाट सिम्रिक एयरलाइन्स भएर सात वर्ष उडान गरेपछि यसले पुनः आफ्नै ब्राण्डमा विमान उडान सुरु गर्ने भएको छ । यो कम्पनीले हाल वायुसेवासँग भएको दुई वटा बिचक्राफ्ट र थप पाँच वटा जेटस्ट्रीम विमान थप गरेको हो । यो वायुसेवाले आगामी दिनमा काठमाडौैंबाट माउन्टेन फ्लाइट, लुक्ला, भद्रपुर, भैरहवा, भरतपुर, विराटनगर, धनगढी, जनकपुर, जोमसोम, तुम्लिङटार, नेपालगन्ज, राजविराज, रामेछाप, सिमरा र सुर्खेतमा नियमित व्यवसायीक उडान भर्ने लक्ष्य लिएको जनाएको छ ।