१७ साउन / अर्थ र व्यापार – नेपालीहरुले विदेशी फेसनका सामाग्री प्रयोग गर्नमा मात्रै वर्षेनी १० अर्ब रुपैयाँ भन्दा बढी नेपाली रुपैयाँ बाहिरिने गरेको छ । आर्थिक वर्ष २०७३/७४ मा  विदेशबाट आयात गरिएका तयारी लुगामा १० अर्ब ५० करोड रुपैयाँ बाहिरिएको छ ।

सबैभन्दा बढी रकम महिलाहरुको तयारी पोशाक आयातमा बाहिरिएको छ । महिलाहरुले लगाउने विदेशी तयारी पोशाकमा दुई अर्ब ४६ करोड रुपैयाँ बाहिरिएको छ । महिलाका लागि आयात भएका कपडाको ठिक आधा रकम बराबरको पुरुषले लगाउने तयारी लुगा भित्रिएको छ । पुरुषको तयारी पोशाक आयातमा एक अर्ब छ करोड रुपैयाँ बाहिरिएको छ ।

महिलाहरुले लगाउने पोशाकमा सबैभन्दा बढी रकम ज्याकेटमा बाहिरिएको छ । ज्याकेट, कोट लगायतका तयारी पोशाकमा एक अर्ब १४ करोड रुपैयाँ बाहिरिएको छ । दोस्रो बढी आयात हुनेमा केटीहरुका लुगा शीर्षकमा ६२ करोड सात लाख रुपैयाँ बाहिरिएको छ। 

तेस्रो धेरै आयात हुनेमा ट्राउजर तथा पाईन्टहरु छन् । ट्राउजर तथा पाईन्टको शिर्षकमा ४४ करोड ४० लाख रुपैयाँ बाहिरिएको छ । त्यस्तै चौथो बढी आयात हुनेमा ब्लाउज तथा सर्ट शीर्षकमा १५ करोड २९ लाख रुपैयाँ बाहिरिएको छ ।

केटीहरुले प्रयोग गर्ने स्कर्ट आयातमा पनि छ करोड २५ लाख रुपैयाँ बाहिरिएको छ । तयारी सुट आयातमा दुई करोड ९३ लाख, रेनकोटमा ७९ लाख, नाईट ड्रेस शीर्षकमा ३३ लाख ७५ हजार र गाउन शीर्षकमा १० लाख रुपैयाँ बाहिरिएको छ ।

पुरुषहरुको तयारी पोशाक आयातमा भने सबैभन्दा बढी ज्याकेटमा ५२ करोड रुपैयाँ बाहिरिएको छ । शर्ट तथा टिशर्ट आयातमा २६ करोड, ट्राउजर तथा पाईन्ट आयातमा २३ करोड रुपैयाँ बाहिरिएको छ ।

महिलाको तुलनामा रेनकोट आयातमा मात्र पुरुषको हिस्सा बढि देखिएको छ । पुरुषको रेनकोट आयातमा दुई करोड रुपैयाँ बाहिरिएको छ । महिलाको रेनकोट आयातमा ७९ लाख रुपैयाँमात्र बाहिरिएको थियो । पुरुषहरुले प्रयोग गर्ने जनावरको रौंबाट बनेका ज्याकेट एक अर्ब ३२ करोड रुपैयाँको आयात गर्दा, नाईट ड्रेस ४५ लाख रुपैयाँको आयात गरेका छन् ।

सल, स्कार्फ र मफलर शीर्षकमा दुई अर्ब ५३ करोड रुपैयाँ बाहिरिएको छ । सल र स्कार्फ महिलाले प्रयोग गर्छन् भने मफलर पुरुषले प्रयोग गर्छन् । ब्याग आयातमा दुई अर्ब ६५ करोड रुपैयाँ बाहिरिँदा जुत्ता आयतमा एक अर्ब २५ करोड रुपैयाँ बाहिरिएको छ । ५६ करोड रुपैयाँ बराबरको टोपी मात्र आयात भएको छ ।