२८ माघ /अर्थ र व्यापार - निजगढ अन्तराष्ट्रिय विमानस्थल आयोजनाले प्रारम्भिक चरणको काम अघि बढाउन तत्कालै ४ अर्ब रुपैयाँ बजेट छुटयाउन सरकारलाई आग्रह गरेको छ । आयोजना कार्यालय सिमराका प्रमुख ओम शर्माका अनुसार प्रारम्भिक चरणको काम अन्तर्गत चर्चामा रहेको टागियावस्तीलाई स्थानान्तरण गर्न र विमानस्थलको सिमाना निर्धारण गर्न उक्त बजेट तत्कालै विनियोजन गर्न आवश्यक रहेको छ ।

सिमरामा आयोजित अन्तरक्रियामा प्रमुख शर्माले भने विमानस्थलको मुख्य चूनौती टागियावस्तीको करिब १५ सय घरधुरीलाई जितपुरसिमरा उपमहानगरकै अन्य वडा तथा कोल्हबी नगरापालिकाको अन्य वडामा स्थानान्तरण गर्नु छ । विमानस्थलको डिपिआर बनाउने परामर्शदाताको छनौट गरी यथाशिघ्र साइटमा खटाउनुपर्ने पनि उनले बताए । उनका अनुसार डिपिआर बनाउन छनौट भएको ६ वटा कम्पनीहरुको अध्ययन विश्लेषण तथा कागजात अध्ययन एवं मूल्याकन गरी चाँडै डिपिआर बनाउन निजगढ विमानस्थालको क्षेत्रमा खटाउनु पर्ने देखिन्छ । प्रारम्भिक चरणको अध्ययन अनुसार करिब ८ हजार हेक्टरमा निर्माण हुने विमानस्थलको लागि शुरुको चरणमा एक लाख भन्दा कमै रुख काटेर न्यून्तम क्षतिमा विमानस्थल निर्माण गर्न सकिने समेत उनल जानकारी दिए ।

३ सय मिटर चौडाईको रनवेमा ६० मिटर चौडा मात्रै पिचको भागबाट पहिलो रनवे र टर्मिनल बनाई विमानस्थल शुरुवात गर्न सकिने भएकाले विमानस्थल सञ्चालन तथा विस्तारको काम विस्तारै हुँदै गएपनि फरक नपर्ने प्रमुख शर्माको तर्क छ । निजगढ विमानस्थलमा ३ वटा रनवे बनाउने नीति रहेकोमा शुरुमा २४ लाख रुख काटने भ्रम जनता माझ छरिएको भन्दै उनले आपत्ति जनाए । नेपालको लागि अन्तराष्ट्रिय विमानस्थलको सबैभन्दा उपयुक्त ठाउँ हाल निर्माण हुन लागेको निजगढ  भएकोले यसको विकल्प नभएको भन्दै शर्माले सरकार तथा राजनीतिक दल एवं प्रदेश २ सरकारलाई  यस विषयमा गम्भीर बन्न पनि उनले सुझाव दिए ।

कार्यक्रममा जितपुरसिमरा उपमहानगरपालिकाका मेयर डा.कृष्ण पौडेलले निजगढ विमानस्थाल बनाउन टागियावस्तीलाई उचित मुआब्जा तथा पुर्नवासको लागि उपमहानगरपालिका जिम्मेवारी साथ अघि बढेको जानकारी गराउँदै यस विषयमा स्थानीयको सहमति पनि भइसकेको बताए ।
उनले विमानस्थल राष्ट्रिय गौरवको आयोजना भएकोले जितपुरसिमरा उपमहानगरपालिकावासीको सहयोग र सदभाव रहने बताए । होटल तथा पर्यटन व्यवसायी संघ बाराका अध्यक्ष मोहन शर्मा लामिछानेले विमानस्थलको निर्माण पर्सा, बारा, मकवानपुर, प्रदेश २ र देशकै होटल व्यवसाय तथा पर्यटनको दृष्टिकोणले अति नै महत्व र सकारात्मक आयोजना भएको बताए ।