२० जेठ /अर्थ र व्यापार  - काठमाडौं उपत्यकामा रात्रीकालीन यातायात सेवा सुरु हुने तयारीमा छ । यातायात व्यवस्था विभागले काठमाडौंका मुख्य स्थानहरुमा कम्तीमा राती १० बजेसम्म सार्वजनिक सवारीसाधन संचालन हुने व्यवस्था मिलाउने भएको हो ।  
विभागले निजी सवारी कम्पनी, साझा यातायात, नेपाल प्रहरी, ट्राफिक लगायतका निकायसंग छलफल सुरु गरिसकेको छ । उपत्यकामा पर्यटकको चाप भएको ठमेल लगायतका स्थान, अस्पताल, व्यापारिक स्थल, यात्रुको चाप बढी हुने रुटमा रात्रीकालीन सेवा संचालन गर्न सकिने निष्कर्ष छलफलबाट निस्किएपछि यसकालागि तयारी सुरु भएको हो ।  

ती स्थानहरु कम्तीमा राती १० बजेसम्म भाडाका सवारीसाधन संचालन गर्ने योजना रहेको यातायात व्यवस्था विभागका महानिर्देशक कुमार प्रसाद दाहालले जानकारी दिए । उनका अनुसार त्यसपछि विस्तारै राजधानीका अन्य रुटमा पनि विस्तार गर्दै लैजाने योजना रहेको छ । बस कम्पनीहरुले सुरक्षा र वैज्ञानिक भाडादर समायोजन गरिदिए रात्रीकालीन सेवा संचालन गर्न सकिने प्रतिक्रिया दिएको यातायात व्यवस्था विभागका महानिर्देशक दाहालले जानकारी दिए । सुरक्षा निकायले सुरक्षाको जिम्मा दिन सक्ने समेत प्रतिवद्धता जाहेर गरेका छन् ।

अहिले भाडाका सवारीसाधन चढ्ने वित्तिकै १५ रुपैयाँ भाडा तिर्नुपर्छ । त्यसमा अशक्त, जेष्ठ नागरिक, विद्यार्थी लगायतलाई ४५ प्रतिशतसम्म छुट दिनुपर्ने व्यवस्था छ । तर रात्रीकालीन सेवाका लागि चढ्ने वित्तिकै २० रुपैयाँ भाडा र छुटको व्यवस्था हटाउनुपर्ने यातायात ब्यवसायीको माग छ । दाहालका अनुसार एक साताभित्रमा सरोकारवाला सबै निकायसंग छलफल र सुझाव लिने काम सकिनेछ । यातायात कम्पनीहरुले रुट इजाजत लिँदा विहान ५ बजेदेखि राती १० बजेसम्म सम्म सेवा संचालन प्रतिबद्धता जनाएका हुन्छन् । तर हालसम्म पनि यो कार्यान्वयन हुन सकेको छैन ।

सवारी ऐनमै उक्त व्यवस्था रहेपनि यात्रु नपाउने र सुरक्षा नहुने भन्दै यातायात व्यवसायीहरु राती बस चलाउन मान्दैनन् । यसबाट सर्वसाधारणलाई राती बाहिर निस्कँदा यातायातका साधन नपाउने समस्या परिरहेको छ । सवारीसाधन सहज भएमा राती पनि  मानिसहरुको चहलपहल बढ्ने विभागको भनाई छ । विभागले रात्रीकालीन सेवाका लागि यातायात ब्यवसायीलाई प्रोत्साहन दिने योजना समेत बनाउन लागेको दाहालले बताए ।  

रात्रीकालीन सेवा संचालन गर्न सके दिनमा हुने ट्राफिक फ्लो समेत घट्ने विभागको भनाई छ । त्यसैगरी शहर समेत १० बजेसम्म जीवन्त हुनेछ । पहिले नाईट बस संचालन गरेर बन्द  भएपनि अहिले आवश्यकता भैसकेका कारण अब संचालनमा आएपछि दिगो हुने दाहालको बुझाई छ । उनले यसबारेमा एक साताभित्र निर्णय हुने र  निर्णय छिट्टै कार्यान्वयनमा ल्याउने दाबी समेत गरे ।