आषाढ १९/अर्थ र व्यापार– साञ्जेन जलविद्युत् आयोजनाले निर्माण गरिरहेको तल्लो साञ्जेन जलविद्युत् आयोजनाको काममा समस्या उत्पन्न भएको छ । 

अर्बपति विनोद चौधरीको स्वामित्व रहेको हिमाल हाइड्रोको लापरवाहिका कारण नेपाली जनताको लगानी रहेको साञ्जेन जलविद्युत् आयोजना समस्यामा परेको हो । 

चिलिमे जलविद्युत् कम्पनीको सहायक कम्पनीको रुपमा रहेको साञ्जेन जलविद्युत् आयोजनाले निर्माण गरिरहेको तल्लो साञ्जेन जलविद्युत् आयोजनाको ठेकेदारका रुपमा हिमाल हाइड्रो रहेको छ ।

सान्जेन जलविद्युत कम्पनीका प्रमुख कार्यकारी अधिकृत किरणकुमार श्रेष्ठले पनि हिमाल हाइड्रोका कारण आयोजना समस्यामा परेको बताए ।

ठेकेदार कम्पनीले समयमा काम नगर्ने, आयोजनाबाट पैसा लिने र बेपत्ता हुने गरेको पाइएको आयोजनाले जनाएको छ । रसुवामा निर्माणाधिन साञ्जेन जलविद्युत् आयोजनाको प्रमुख काम विगत ६ महिनादेखि करिब करिब अलपत्र अवस्थाको रहेको छ ।
भूमिगत संरचना निर्माण गर्न सहायक ठेक्का पाएको हिमाल हाइड्रोको समयमै काम नगर्दा आयोजना सम्पन्न हुने समय र लागत समेत बढ्दै गएको छ ।

भारतीय तथा नेपाली कम्पनी एसइडब्लु टुन्डी जेभीले मुख्य सुरुङ र भर्टिकल साफ्ट सुरुङ निर्माण गर्न हिमाल हाइड्रोलाई सहायक ठेक्का दिएको थियो । भारतीय कम्पनी पनि उनै चौधरीले नै नेपाल भित्र्याएका थिए ।

विगत ६ महिनादेखि निर्माण कार्यमा समस्या थुपार्दै आएको हिमाल हाइड्रोलाई कामको गतिलाई तीव्रता दिन पटक पटक ताकेता गरे पनि हिमाल हाइड्रोले अटेरी गरिरहेको कम्पनीले जनाएको छ । हिमाल हाइड्रोले जिम्मा लिएको आयोजनाको मुख्य सुरुङ र छड्के भर्टिकल सुरुङ लगायतको कामको गति एकदमै सुस्त रहेको छ ।

कूल २५० मिटर लामो छड्के भर्टिकल सुरुङ पूरा गर्न २ वर्ष लगाएको हिमाल हाइड्रोले सोही खालको अर्को सुरुङ निर्माण्मा समेत दुई वर्षभन्दा बढी लगाउने अवस्था देखिएको आयोजनाको दाबी छ ।

हिमाल हाइड्रो टाट पल्टिएको दाबी गर्दै काम रोकेको पनि बताइएको छ । कम्पनी टाट पल्टिएको तर्क अगाडि सारेर हिमाल हाइड्रोले काम रोकेको र निहुँ खोज्ने मात्रै काम गरेको आयोजनाको भनाइ छ । 

हिमाल हाइड्रो सिभिल संरचना निर्माण गर्न नर्वे्जियन कम्पनी स्टेटक्राफ्टले स्थापना गरेको कम्पनी हो । यही कम्पनीले नर्वेको लगानीमा निर्माण भएको ६० मेगावाटको खिम्तीको सुरुङ खनेको थियो । नर्वे्जियनले छोडेपछि नेपालमा यो कम्पनीले दर्जनौं आयोजनामा निर्माण गरेको छ । तर, चौधरीको स्वामित्वमा आएपछि कम्पनी धराशयी हुँदै गएको दाबी गरिएको छ ।

आयोजनाबाट आगामी डेढ वर्ष्भित्र विद्युत् उत्पादन गर्ने लक्ष्य छ । सो आयोजना समयमा सम्पन्न नहुने हो भने त्यसबाट कम्पनी तथा नेपाल विद्युत प्राधिकरणलाई ठूलो आर्थिक नोक्सानी हुने देखिएको छ ।

चौधरीको कम्पनीका कारण आयोजनाको काम रोकिएपछि आयोजना प्रमुख किरणकुमार श्रेष्ठले प्राधिकरणका कार्यकारी निर्देशक कुलमान घिसिङलाई समेत जानकारी गराएका छन् ।