१४ कात्तिक/अर्थ र व्यापार– चालु आर्थिक वर्षको पहिलो तीन महिनामा वीरगंज नाकाबाट सवारी साधन र इन्धनको आयातमा ४८ प्रतिशतले गिरावट आएको छ ।

कोरोना महामारीका कारण गत आर्थिक बर्षको पहिलो ३ महिनाको तुलनामा चालु आर्थिक बर्षको ३ महिनामा सवारी साधन र इन्धनको आयातमा उल्लेख्य कमी आएको वीरगंज भन्सार कार्यालयले जनाएको छ । 

गत आर्थिक वर्षको पहिलो तीन महिनामा २ अर्ब २ करोड मूल्यबराबरका २ हजार ९ सय २२ वटा जीप, कार र भ्यान भित्रिएका थिए । तर चालु आर्थिक बर्षमा कोरोना संक्रमणका तीन महिनामा १ अर्ब ७१ करोड मूल्य बराबरका १ हजार ५ सय १० वटा जीप, कार र भ्यान भित्रिएका छन् ।

चालु आर्थिक बर्षको पहिलो ३ महिनामा मोटरसाइकल आयातमा समेत ३७ प्रतिशतले गिरावट आएको छ । चालु आर्थिक वर्षको तीन महिनामा १ अर्ब ८ करोड मूल्यका २१ हजार ५० वटा मोटरसाइकल आयात भएका छन् । गत वर्षको सोही अवधिमा २ अर्ब ७४ करोडका ३३ हजार ४ सय २२ वटा मोटरसाइकल भित्रिएका थिए ।

वीरगंज भन्सार कार्यालयका प्रवक्ता विमलकुमार साहका अनुसार पीकअप गाडी, ट्रक, बस, मिनीबस, अटोरिक्सा टेम्पो, ट्रयाक्टर, डम्परलगायतका सबैखालका साधनको आयातमा कमि आएको बताए । 

कोरोना महामारीका कारण चालु आर्थिक बर्षको ३ महिनामा यातायात सेवा, हवाइ सेवा लामो समय बन्द हुँदा इन्धनको आयातमा समेत उल्लेख्य गिरावट आएको छ । 

गत आर्थिक वर्षको पहिलो ३ महिनामा ४२ हजार ६ किलोलिटर हवाई इन्धन आयात भएकोमा चालु आर्थिक बर्षको ३ महिनामा ११ हजार २३६ किलोलिटर हवाई इन्धन आयात भएको छ । 

चालु आर्थिक बर्षमा पेट्रोल आयातमा २५ प्रतिशतले गिरावट आएको छ । चालु आर्थिक बर्षको तीन महिनामा ३ अर्ब ११ करोड १४ लाख २९ हजार मूल्य बराबरको ६९ हजार ३ सय ९६ किलोलिटर पेट्रोल आयात भएको छ । 

गत आर्थिक बर्षको ३ महिनामा ५ अर्ब ४५ करोड १९ लाख ६६ हजार मूल्य बराबरको ९२ हजार २ सय १२ किलोलिटर पेट्रोल आयात भएको थियो ।

चालु आर्थिक बर्षको तीन महिनाको अवधिमा ४ अर्ब ९२ करोड ७५ लाख ५५ हजार मूल्य बराबरको १ लाख ५ हजार ७ सय ६८ किलोलिटर डिजेल आयात भएको छ । सोही अवधिमा गत वर्ष ११ अर्ब २७ करोड २५ लाख १० हजार मूल्य बराबरको १ लाख ७३ हजार २० किलोलिटर डिजल आयात भएको थियो ।

चालु आर्थिक बर्षको पहिलो ३ महिनामा एलपिजी ग्याँसको आयातमा पनि १५ प्रतिशतले कमी आएको छ । चालु आवको तीन महिनामा ३ अर्ब २३ करोड ८६ लाख ६६ हजार मूल्य बराबरको ५ करोड ६० लाख ७८ हजार ८ सय केजी ग्यास आयात भएको छ ।

गत आवको सोही अवधिमा ३ अर्ब ९८ करोड १९ लाख ४८ हजार मूल्य बराबरको ६ करोड ६३ लाख ६ हजार २ सय ९० किलो ग्यास आयात भएको वीरगंज भन्सार कार्यालयले जनाएको छ ।