१८ माघ/अर्थ र व्यापार – प्रधानमन्त्री केपी शर्मा ओलीले मुलुकको अर्थतन्त्र सुधारकालागि सरकारले सबै उपाय अवलम्बन गरेको दावी गरेका छन । शुक्रबार प्रतिनिधि सभाको बैठकमा समय लिएर बोल्दै प्रधानमन्त्री ओलीले यस्तो दावी गरेका हुन् । उनले व्यावसायिक मनोबल बढाएर उत्पादन वृद्धिका लागि अध्यादेश ल्याएको प्रष्टीकरण दिँदै संसद्बाट कानुन बनाउन कम्तीमा ५÷६ महिना लाग्ने भएकाले त्यति लामो अवधि कुर्न नसक्ने निष्कर्षमा अध्यादेश ल्याएको बताए ।
‘संसद्लाई प्रक्रियाको बन्दी बनाइन्छ, संसद्बाट कानुन बनाउन कम्तीमा पनि ५÷६ महिना लाग्छ, हामी त्यत्रो लामो समय कुर्ने अवस्थामा थिएनौं, त्यसैले अध्यादेश ल्याएका हौं,’ उनले भने । सरकारले गत २९ पुसमा ४ वटा र २ माघमा एउटा अध्यादेश ल्याएको थियो । ती अध्यादेशमार्फत २९ वटा कानुन संशोधन गरिएको छ । सुशासन प्रवर्धन र लगानीको वातावरण बनाउनका लागि अध्यादेश ल्याएको ओलीले बताए ।
उनले बजारमा मागमा कमीका साथै ऋण लगानी हुन नसकिरहेको अवस्थालाई ख्याल गरी व्यावसायिक मनोबल बढाएर उत्पादन वृद्धिका लागि अध्यादेश ल्याएको जवाफ दिए । ‘व्यवसायीले किन ऋण लगानी गरिरहेको छैन? घरजग्गा व्यवसाय किन सुस्तायो? बजारमा किन मागमा कमी आयो? यो कुरालाई हामीले नजिकबाट हेरिरहेका थियौं,’ ओलीले भने, ‘अध्यादेश जनताको सरकारले जनताका लागि गरेको काम हो।’
उनले अर्थतन्त्र सुधारका लागि सरकारले सबै उपाय अवलम्बन गरेको बताए । ‘अर्थतन्त्रमा सुधार ल्याउन जे–जे गर्न सकिन्छ सरकारले त्यो गरेको छ । निजी क्षेत्रका माग अनुसार काम गरेका छौं,’ उनले भने ।
उनले आफूले सरकारको नेतृत्व सम्हालेपछि अर्थतन्त्रका सबै सूचकमा सुधार भएको दाबीसहितको तथ्यांक पनि प्रस्तुत गरे । उनले अर्थतन्त्र चलायमान बनाउनका लागि सरकारले निर्माण व्यवसायीको ३० अर्ब रुपैयाँ फरफारक गरेको जानकारी दिए । यसैगरी, प्रधानमन्त्री ओलीले कानुन निर्माणमा संसद्ले गरेको ढिलाइप्रति असन्तुष्टि जनाउँदै अब आइन्दा ६० दिनभित्र विधेयक टुंग्याउन आग्रह गर्दै ९० दिनभित्र पनि पारित नभएको अवस्थामा सरकारले वैकल्पिक व्यवस्था गर्ने बताए ।
उनले प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाललाई लक्षित गर्दै सरकार ढल्ने सपना नदेख्न आग्रह गरे।