२८ मंसिर/अर्थ र व्यापार – मधेस प्रदेशको राजधानी जनकपुरधाममा एसियाली विकास बैंक (एडिबी) र नेपाल सरकारको साझेदारीमा उर्जा क्षेत्रको विकासलाई दर्शाउने विशेष फोटो प्रदर्शनी सुरु भएको छ। महेन्द्र नारायण निधि मिथिला सांस्कृतिक केन्द्रमा आयोजित प्रदर्शनीको उद्घाटन मधेस प्रदेशका अर्थमन्त्री सुनिल कुमार यादवले गरेका छन्। प्रदर्शनीमा उर्जा क्षेत्रको ऐतिहासिक तथा यथार्थपरक विकासलाई चित्रण गर्ने ५० आकर्षक तस्वीर समावेश गरिएको छ।

कार्यक्रमलाई सम्बोधन गर्दै अर्थमन्त्री यादवले मधेस प्रदेशको आर्थिक र सामाजिक विकासमा एसियाली विकास बैंकको योगदान महत्त्वपूर्ण रहेको उल्लेख गरे। उनले भने, “उर्जाको क्षेत्रमा एडिबीको लगानीले मधेसका जनताको जीवनस्तर उकास्न ठूलो भूमिका खेलेको छ। आगामी दिनमा मधेस प्रदेशका अन्य विकास परियोजनामा एडिबीसँग सहकार्य गर्न हामी प्रतिबद्ध छौं।“

जनकपुर उपमहानगरपालिकाका उपप्रमुख किसोरी साहले प्रदर्शनीले जनकपुरलगायत मधेस प्रदेशमा विद्युतिकरण र सामाजिक परिवर्तनका उपलब्धिलाई दर्साएको बताउँदै नगरवासीलाई प्रदर्शनी हेर्न आग्रह गरे। “यसले हाम्रो उर्जा क्षेत्रको सफलतालाई नजिकबाट बुझ्न सहयोग पु¥याउनेछ,“ उनले भने।

नेपाल विद्युत प्राधिकरणका उप–प्रवन्ध निर्देशक तारा प्रसाद प्रधानले देशभरको विद्युतिकरणमा एसियाली विकास बैंकको सहकार्यले उल्लेखनीय प्रगति हासिल भएको बताए। “उर्जाको विकासले आम जनताको आर्थिक स्थिति सुधार्ने मात्र होइन, देशको समग्र विकासलाई अघि बढाउने बलियो आधार तयार गरेको छ,“ प्रधानले थपे।

नेपाल पत्रकार महासंघ धनुषा शाखाकी अध्यक्ष मोनिका झाले प्रदर्शनीले विद्युत विकासका विभिन्न पक्षलाई उजागर गर्दै समाजका सबै तहलाई छुने खालको भएको धारणा व्यक्त गरिन्। उनले भनिन्, “उर्जा क्षेत्रको विकासमा एडिबीको योगदानका दृष्टान्तहरू अध्ययन गर्न यो प्रदर्शनी प्रभावकारी छ।“

फोटो पत्रकार क्लबका अध्यक्ष द्वारिका काफ्लेले प्रदर्शनीको उद्देश्य नेपालको उर्जा क्षेत्रमा भएका प्रगतिहरूलाई दृश्यात्मक माध्यमबाट सर्वसाधारणसम्म पु¥याउनु रहेको बताए। उनले भने, “लोडसेडिङको समस्याबाट मुक्त भएको नेपाल निर्माण गर्न एडिबीको भूमिका ऐतिहासिक छ। यो प्रदर्शनीले अध्ययन र अनुसन्धानकर्ताका लागि उपयोगी सामग्री उपलब्ध गराउनेछ।“

एसियाली विकास वैकले नेपालको उर्जा क्षेत्रको उत्पादन ,वितरण र प्रसारणमा गरेको सहयोगले नेपालको समग्र आर्थिक सामाजिक विकासमा पुगेको योगदानलाई यस प्रदशनीले तस्विर मार्फत समेटेको छ । नेपालमा विगतमा १८ घण्टा सम्म रहेको लोडसेटिड अत्यगरी उज्यालो नेपाल बनाउन एडिवीले गरेको योगदान र भुमिका कस्तो थियो भनेर अध्यन र अनुसन्धान गर्न समेत यो प्रदशनी उपयोगी हुने विश्वास लिएको काफ्लेको भनाई थियो । फोटो प्रदर्शनी उत्पादन,प्रसारण,वितरण र यिबोन्ड द मिटर गरी ४ भागमा विभाजन गरिएको छ ।