२७ फागुन/अर्थ र व्यापार – राजश्व छलिमा संलग्न बोटलर्स नेपालविरुद्ध सरकारले झन्डै साढे ७ अर्ब रुपैयाँको मुद्दा दायर गरेको छ । विगत लामो समयदेखि नेपालमा आफुनो उद्योगा तथा व्यापार विस्तार गरि कोकाकोला,इस्प्राइट लगायतका पेयपदार्थ उत्पादन र विक्री गर्दै आएको बहुराष्ट्रि कम्पनी बोटलर्स नेपाल विरुद्ध राजश्व अनुसन्धान विभागले पूँजीगत लाभकर छली गरेको भन्दै शुक्रबार उच्च अदालत पाटनमा मुद्दा दायर गरेको हो । विभागले उच्च अदालत पाटनमा सो कम्पनी बिरुद्ध ७ अर्ब ४३ करोड ६३ लाख ८२२ रुपैयाँ बराबरको कर र तथा बिगो दावी सहित मुद्दा दायर गरेको जनाएको छ ।
विभागका महानिर्देशक प्रकाश पौडेलले यस्तो जानकारी गराएका हुन । विभागका अनुसार यसअघि परेको उजुरीको आधारमा बोटलर्स नेपाल बिरुद्ध पूँजीगत लाभकर छलीमा विभागले अनुसन्धान गर्दै आएको थियो ।
बोटलर्स नेपाल लिमिटेडको आधाभन्दा बढी स्वामित्व एउटा कम्पनीबाट अर्कोमा हस्तान्तरण गर्दा पूँजीगत लाभकर छलेको विभागको आरोप छ । बोटलर्स नेपालसहित १७ जना प्रतिवादी बनाएर उच्च अदालत पाटनमा मुद्दा दायर गएको विभागले जनाएको छ । यस मुद्दामा बोटलर्स नेपालका सञ्चालक र विभिन्न शाखाका प्रमुखहरु लगायत कुल १७ जनालाई प्रतिवादी बनाएर मुद्दा दायर गरिएको विभागले जनाएको छ ।