१३ पुस / अर्थ र व्यापार - चिकित्सा शिक्षा तयारी कक्षाको लागी विशेष पहिचान बनाएको काठमाडौंको पुतलीसडक, रामशाहपथस्थित नेम (नेम ईन्ष्टिच्युट फर मेडिकल एजुकेशन) ले मेडिकल तयारी कक्षामा भएको आफ्नो एकलौटीको फाईदा उठाउँदै विद्यार्थीसंग उच्च शुल्क लिने गरेको तर सोहि अनुसारको गुणस्तरीय शिक्षा नदिएको पाईएको छ । 

मेडिकल तयारी कक्षाका लागी आफ्नो ब्राण्ड समेत बनिसकेको कारण पछिल्लो समय नेमले उच्च शुल्क लिने गरेको र विद्यार्थीलाई टहरामा राखेर पढाउने गरेको, अनलाईन शिक्षाका लागी समेत उच्च शुल्क लिने गरेको सो ईन्ष्टिच्युटमा तयारी कक्षामा अध्ययनरत विद्यार्थीहरुले गुनासो गरेका छन ।

चिकित्सा शिक्षा स्नातक तह (एमबिबिएस),नर्सिङ तथा पारामेडिकल विषयमा तयारी कक्षा सञ्चालन गर्दै आएको नेमले भौतिक रुपमा सञ्चालित कक्षामा ठुलो संख्यामा एउटै कक्षामा विद्यार्थी राख्ने गरेको, व्यवस्थापनले शुल्क मात्र लिने तर सोहि अनुसारको स्तरीय तयारी कक्षा सञ्चालनमा ध्यान नदिएको तथा आँफुहरुलाई टहरामा राखेर पढाईएको भन्दै विद्यार्थीहरुले गुनासो गरेका छन । साथै आफ्नो उज्जवल भविष्य निर्माणको सपना देखेका विद्यार्थीहरु नेमवाट आँफुहरुको सपनामा चोट पुगेको वताउँछन । सो विषयमा व्यवस्थापन संग गुनासो गर्दा व्यवस्थापनले विगतमा आफ्नो ईष्टिच्युटमा अध्ययन गरेका विद्यार्थीहरुको सफलता देखाउँदै विद्यार्थीहरुको गुनासोमा कुनै ध्यान नदिएको पिडित विद्यार्थीहरु वताउँछन ।

पछिल्लो समय व्यवस्थापनले चिकित्सा शिक्षा तयारी कक्षामा आफ्नो एकलौटी रहेको भन्दै विद्यार्थीहरु संग चर्को शुल्क लिने गरेको छ । नेमले एउटै विद्याथीसंग तयारी कक्षाका लागी २५ देखि ४० हजार रुपैयाँ सम्म लिने गरेको छ । चिकित्सा शिक्षा तयारी कक्षामा आफ्नो २५ वर्षको अनुभव रहेको भन्दै नेमले आँफुले जे गरेपनि विद्यार्थीहरु अन्यत्र नजाने दावी गर्दै अनलाईन शिक्षाका नाममा समेत मासिक दश हजार पाँच सय रुपैयाँ सम्म विद्यार्थीसंग असुल्ने गरेको छ । अर्कोतिर एकपटक शुल्क तिरिसकेका विद्यार्थीहरु संग पनि एप्स सञ्चालन वा अन्य वाहनामा समेत शुल्क लिने गरेको भेटिएको छ ।

नेपाल सरकारले यस्ता तयारी कक्षा सञ्चालनको सम्बन्धमा ठोस ऐन र कानुन निर्माण नगर्दा विद्यार्थीहरु मर्कामा पर्ने गरेका छन । यस सम्बन्धमा शिक्षा मन्त्रालय संग बुझ्दा यस विषयमा मन्त्रालयको ध्यानाकर्षण भएको वताउँदै आगामी दिनमा उचित निति–निर्माण गर्ने र यस्ता संस्थाहरुको नियमन गर्ने मन्त्रालयका अधिकारीहरु वताउँछन ।