९ फागुन /अर्थ र व्यापार - नेप्सेमा सुचिकृत १५ निर्जीवन बीमा कम्पनीहरुले चालू आर्थिक वर्षको दोस्रो त्रैमास सम्ममा ५ अर्ब ३६ करोड ६० लाख रुपैयाँ खुद बीमा शुल्क आर्जन गर्दा १ अर्ब ३१ करोड ८७ लाख रुपैयाँ खुद नाफा कमाएका छन् । हाल नेपालमा २० निर्जीवन बीमा कम्पनीहरु सञ्चालनमा छन् ।

१५ निर्जीवन बीमा कम्पनीहरु मध्ये खुद बीमा शुल्क र खुद नाफा आर्जनको आधारमा शिखर इन्स्योरेन्स अब्बल देखिएको छ । बीमा कम्पनीहरुको आम्दानीको मुख्य स्रोत बीमा शुल्क आर्जन गरी धेरै नाफा कमाउन शिखर इन्स्योरेन्स सफल भएको हो । यस अवधिमा इन्स्योरेन्सले ९० करोड ४९ लाख रुपैयाँ खुद बीमा शुल्क आर्जन गरी २१ करोड २० लाख रुपैयाँ खुद नाफा कमाएको छ । यस्तै नेको इन्स्योरेन्सले ६० करोड ३१ लाख रुपैयाँ बीमा शुल्क संकलन गरी १७ करोड ३ लाख रुपैयाँ खुदनाफा आम्दानी गरेको छ । यसैगरी २५ करोड ६७ लाख रुपैयाँ खुद बीमा शुल्क आर्जन गरेको राष्ट्रिय बीमा कम्पनीले १६ करोड ८४ लाख रुपैयाँ खुद नाफा कमाएको छ ।

युनाइटेड इन्स्योरेन्सले सबै भन्दा कम १५ करोड ५७ लाख रुपैयाँ खुद बीमा शुल्क आर्जन गरी १ करोड ७४ लाख रुपैयाँ मात्रै आम्दानी गरेको हो । बीमा समितिले गरेको व्यवस्था अनुसार चालु आर्थिक वर्षको दोस्रो त्रैमाससम्ममा ५ कम्पनीले चुक्ता पूँजी कायम गरेका छन् । बीमा समितिले तोकेको न्युनतम १ अर्ब चुक्ता पूँजी नेको इन्स्योरेन्स, शिखर इन्स्योरेन्स, हिमालयन जनरल, नेपाल इन्स्योरेन्स र प्रभु इन्स्योरेन्सले तोकेको चुक्ता पूँजी पुर्याएका हुन् । नेको इन्स्योरेन्सको चुक्त पुँजी १ अर्ब १७ करोड रुपैयाँ छ । यस्तै शिखरको १ अर्ब ५ करोड, हिमालयन जनलरको १ अर्ब २ करोड, नेपाल इन्स्योरेन्सको १ अर्ब १ करोड र प्रभु इन्स्योरेन्सको १ अर्ब ५० लाख रुपैयाँ चुक्ता पूँजी छ । बाँकी कम्पनीहरुले पनि चुक्ता पूँजी वृद्धिको तयारी गरिरहेका छन् । राष्ट्रिय बीमा कम्पनीको चुक्ता पूँजी सबैभन्दा थोरै अर्थात २६ करोड ६६ लाख रुपैयाँ छ । सबैभन्दा थोरै चुक्ता पूँजी भएको राष्ट्रिय बीमा कम्पनीको जगेडा र बीमा कोषमा भने ठूलो रकम सञ्चित भएको छ । कम्पनीको जगेडा कोषमा २ अर्ब १५ करोड र बीमा कोषमा १ अर्ब ४३ करोड रुपैयाँ सञ्चित छ ।

शिखर इन्स्योरेन्सको जगेडा कोषमा ३४ करोड ८८ लाख र बीमा कोषमा ९५ करोड ७२ लाख रुपैयाँ सञ्चित छ । यस्तै नेको इन्स्योरेन्सको जगेडा कोषमा ४४ करोड र बीमा कोषमा ५४ करोड ३४ लाख रुपैयाँ छ । युनाइटेड इन्स्योरेन्सको जगेडा कोषमा सबैभन्दा कम ४ करोड ४० लाख रुपैयाँ सञ्चित छ भने आइएमई जनरल इन्स्योरेन्सको बीमा कोषको आकार सबैभन्दा सानो छ। आइएमईको बीमा कोषमा २० करोड ७२ लाख रुपैयाँ सञ्चित छ । राष्ट्रिय बीमा कम्पनीको चुक्ता पूँजी थोरै भएका कारण प्रतिशेयर आम्दानी र नेटवर्थ सबैभन्दा धेरै देखिएको छ। कम्पनीको प्रतिशेयर आम्दानी १२६ रुपैयाँ ३४ पैसा, प्रतिशेयर नेटवर्थ ९०८ रुपैयाँ १६ पैसा कायम छ । यस्तै शिखर इन्स्योरेन्सको प्रतिशेयर आम्दानी ४० रुपैयाँ १० पैसा र प्रतिशेयर नेटवर्थ १३२ रुपैयाँ ९९ पैसा रहेको छ । सबैभन्दा कम प्रतिशेयर आम्दानी रहेको प्रभु इन्स्योरेन्सको ८ रुपैयाँ ८४ पैसा र सबैभन्दा कम प्रतिशेयर नेटवर्थ रहेको युनाइटेड इन्स्योरेन्सको ११४ रुपैयाँ ५७ पैसा छ । राष्ट्रिय बीमा कम्पनीको मूल्य आम्दानी अनुपात सबैभन्दा धेरै अर्थात ७३.६१ गुणा बढी छ भने नेको इन्स्योरेन्सको सबैभन्दा कम १७.६९ गुणा बढी छ ।