३० ज्येष्ठ  / अर्थ र व्यापार- नेपालको विभिन्न स्थानमा पदयात्रा तथा पर्वतारोहणमा जाने पर्यटकहरुको उद्धारको नाममा ठगी गर्नेहरुमाथिको कार्वाही अन्तिम चरणमा पुगेको जानकारी अर्थ र व्यापारलाई प्राप्त भएको छ । नेपाल घुम्न आउने पर्यटकलाई दूषित खाना दिई बिरामी बनाएर हेलिकप्टरमार्फत फर्जी उद्धार र उपचार गर्ने केही एजेन्सीले हेलिकप्टर कम्पनी तथा अस्पतालसँग मिलेर विदेशी बिमा कम्पनीबाट वर्षौंदेखि करोडौं रुपैयाँ असुल्ने धन्दा चलाएपछि संस्कृति,पर्यटन तथा नागरिक उड्ड्यन मन्त्रालयले यस सम्बन्धमा अनुसन्धान गर्न आयोग गठन गरेको थियो ।

संस्कृति,पर्यटन तथा नागरिक उड्ड्यन मन्त्रालयका सहसचिव घनश्याम उपाध्यायको संयोजकत्वमा गठित कार्यदलले दिएको सुझाव पर्यटन मन्त्रालयले थप अनुसन्धान र कार्वाहीका लागि प्रधानमन्त्री कार्यालय, गृह मन्त्रालय लगायत नेपाल प्रहरीको महानगरीय आयुक्त कार्यालय, राजस्व अनुसन्धान विभाग, नेपाल प्रहरीको केन्द्रीय अनुसन्धान ब्युरो, नागरिक उड्ड््यन प्राधिकरणलाई सम्बन्धित क्षेत्राधिकारभित्र पर्ने एजेन्सीलाई कारबाही गर्न निर्देशन दिएको थियो ।

पछिल्लो समय गत पुष महिनादेखि आयोगको सुझावमा केन्द्रित रहेर नेपाल प्रहरीको केन्द्रिय अनुसन्धान व्युरो र सम्पति शुद्धिकरण अनुसन्धान विभागले अनुसन्धान गरिरहेको जानकारी प्राप्त भएको छ । व्युरो र विभागले फर्जी बिरामी तथा बिल बनाई उद्धारमा संलग्न हुने कम्पनीहरुमा छापा मारेर र अन्य कागजात झिकाएर गरेको अनुसन्धानवाट  तीनवटा हेलिकोप्टर कम्पनी, चार वटा अस्पताल र आठ वटा ट्राभल / ट्रेकिङ र तीन रेस्क्यु कम्पनीलाई दोषी ठहरी गरि कार्वाहीको सिफारिस गरेको गृह मन्त्रालय स्रोतले अर्थ र व्यापारलाई वतायो । 

त्यसबाहेक आयोगको प्रतिवेदनमा उल्लेख गरिएका केहि हस्पिटल, ट्रेकिङ/ ट्राभलहरुले भने उन्मुक्ति पाएको बुझिएको छ । दोषिहरु माथि ठगी र अकुत सम्पत्ति आर्जनको मुद्दा चलाईने स्रोतले अर्थ र व्यापारलाई वतायो ।

पछिल्लो समय फेक रेस्क्युमा संलग्नहरुमाथि कार्वाही गर्ने अडान लिएका तत्कालिन संस्कृति, पर्यटन तथा नागरिक उड्ड्यन मन्त्रालयका सचिव कृष्णप्रसाद देवकोटाको सरुवा र तत्कालिन पर्यटन मन्त्री रवन्द्र अधिकारीको निधन भएपश्चात फेक रेस्क्युमा संलग्नहरु माथिको अनुसन्धान प्रभावित हुन्छ कि भन्ने आशंका पर्यटन क्षेत्रमा व्याप्त थियो । तर व्युरो र विभागको अनुसन्धानले कार्वाहीको अन्तिम चरणमा पुगेको अनुसन्धानमा संलग्न एक अधिकारीले अर्थ र व्यापारलाई वताए ।