११ साउन/अर्थ र व्यापार– पूर्वी नाका काँकडभिट्टाबाट आर्थिक वर्ष २०७७/७८ मा कृषिजन्य वस्तुको निर्यात उल्लेख्य बढेको छ।

क्वारेन्टिन कार्यालय काँकरभिट्टाको तथ्यांकअनुसार आर्थिक वर्ष २०७७/७८ मा आयात भन्दा निर्यात चार गुणले बढेको हो । 
गत आवमा रू. चार अर्ब १२ करोड ३८ लाख ८९ हजारको कृषिजन्य वस्तु निर्यात भएको छ भने रू. एक करोड १९ लाख ७० हजारको मात्रै आयात भएको छ ।

कार्यालयका वरिष्ठ बाली संरक्षण अधिकृत देवेन्द्र साहुले कोभिड–१९ को संक्रमणकालीन अवस्थामा निर्यात बढी देखिनुमा अन्तरराष्ट्रिय बजारमा कृषिजन्य वस्तुको मूल्य बढ्नु मुख्य रहेको बताए ।

नेपालबाट पूर्वी नाका काँकडभिट्टा हुँदै भारत र बंगलादेशमा सबैभन्दा बढी अलैँची, मजिठो, रिठ्ठा, मुसुरो, अदुवा, अम्लिसो, चिया, चिराइतो, जटामसी, अमलालगायतका कृषिजन्य वस्तुको निर्यात हुने गरेको छ ।